MIP hnuaia sum hman dik loh thubuai Ngaihtuah zui turin Court-in a pawm

Eiruk thubuai ngaihtuahtu Special Court chuan, Mizoram Intodelhna Project (MIP) hnuaia sum hman dan a dik lo nia puhna awm chu ngaihtuah zui zel tur atan a pawm. Special Court thutlukna hi Gauhati High Court (GHC), Aizawl Bench-ah khin ni mah se, High Court chuan a pawmpui.

Anti Corruption Bureau (ACB)-in MIP sum hman dan an chhui­naa an thil hmuh chhuah (chargesheet) an thehluh chu Special Court-in a zir chian hnuah thubuai kalpui zui zel tlakah a ngai a, April 26, 2018 khan ngaih­tuahzui zel turin a pawm. ACB hian MIP sum hman dan an chhuinaah hian dan dik lo taka hman a awm ngeiin an ngai a ni.

Special Court thutlukna hi pawm loin mi pali - MIP kalpui a nih laia chief minister Zoram­thanga, Agriculture minister H Rammiawi, adviser to chief minis­­ter Lalhuapzauva leh Venus Bam­boo Ltd.-a an hotu KK Shah te chuan Gauhati High Court, Aizawl Bench-ah an khing let a ni.

Sorkar ukilte hnen aṭanga thu dawn danin, Gauhati High Court hian tun hnai khan mi palite'n Special Court thutlukna an khin lêt chungchangah thutlukna a siam a, Special Court-in thutlukna a siam danah tih dik loh a neih a hre lo. Chutih rualin, thubuaiah hian Special Court-in thutlukna a siam har lutuk thu a a tarlang thung.

MIP sum hman dan thubuai hi November 3, 2015 khan sorkar ukilte chuan Special Court-ah an sawi hawng ṭan a, chumi ṭum chuan lehlam ukilte pawh an awm. An sawi duhte chu ziakin December 3, 2015 hmaa thehlut tura hriattir an ni.

Thubuai ngaihtuah hun hi sorkar ukil lamte ngenna avangin ṭum eng emaw zat sawn a ni a, October 25, 2017 khan ngaihtuah leh ṭan niin, April 26, 2018 khan Court chuan thubuai chu ngaihtuah zui zel turin a pawm ta a ni.