NH-54 kawngpui laih tlang a ni

Serchhip Sailiam kâwn bula NH-54 kawngpui min chu PWD-in a chhak lam an laih belh hnuah nimin khan an lai tlang a, lung phah hna an thawk ṭan leh nghal dawn.

Serchhip leh Keiṭum inkara NH-54 kawngpui nasa taka min bal vek hi lirthei kal theiha titlang leh turin June 17, 2018 khan a chhak lamah kawng tur laih ṭan a ni a; kar liam ta chhung khan laih tlang hman beisei ni mah se, an lai tlang hman lo deuh a, nimin khan an lai tlang thei ta a ni.

PWD chief engineer (Highways) K Lalsawm­vela'n Vanglaini palai zawhna chhanga a sawi danin, kawng hi nimin chawhma lam khan laih tlang a ni a, a chhuat siam rem a nih hnuah lirthei lian chi tangkhangte chhuahtirin, kaltlangtir an ni. Truck tangkhangte chhuahtir zawh a nih hnuah nimin tlai lam aṭang khan kawng chhuat tihmuk hna thawh leh a ni.

K Lalsawmvela chuan, kawng chhuat tihmuk hna thawh hun chhung a rei dawn lo tih sawiin, "Khuain min bumro loh chuan kawng roll muk hna hi zawh thuai a ni dawn a, chumi hnuah blacktop turin lung phah hna ṭan leh nghal a ni ang," a ti.

Tarlan tawh angin, NH-54 kawngpui hi Serchhip Sailiam kâwn piahah June 13, 2018 khan nasa takin a min a, kawngpui chhak lam aṭanga min ṭanin, kawng chhuat pawh metre 100 vela thui a min bal vek a ni.

Serchhip District Di­saster Manage­ment Authority hotute leh PWD CE K Lalsawmvela leh officer dangte'n kawngpui laih dan tur an buaipui nghal a; Serchhip lam leh Keiṭum lam aṭangin excavator pahnih hmanga laih a ni. Kawng laih belhna tur ram chu mimal ram a nih avangin, a neitu pawh biak a ni a, NH-54 hi double lane-a la zauh thawh tur a nih avangin, chuta tana hna thawh hunah chuan tuna kawng zauh turah pawh zangnadawmna pek dan tur pawh ngaihtuah turin an ti a ni.