Lottery tender chhuah mek titawp turin MNF party-in Mizoram sorkar an phût

MNF party-a general secretary leh MNF Vigilance Committee-a vice chairman L Thangmawia chuan, Mizoram state lottery tender chhuah mek chu tihtawp an phût a, lottery kalpui mektute term chu a tâwp tawh avangin tuna lottery kalpui mek pawh tihtawp an phût thu a sawi.

L Thangmawia hian nimin khan Aizawl Press Club-ah thuthar thehdarhtute a kâwm a; lottery aṭangin sum a luh tam viau laiin Mizoram sorkara chhûn luh erawh a tlem hle nia sawiin, "Hei hi siamṭhat a nih theih nan tuna tender sorkarin a chhuah hi sût leh a, firm tam zawkin an chhàn theih tura kawng hawng zau a, lottery hralhna pumpui aṭanga tuna 0.5% pawh Mizoram sorkar sum báwma lut pha lo hi 20% tal a luh theih nan duang ṭha leh turin kan phût a ni," a ti.

Thangmawia chuan, Mizoram sorkar tana hlâwk tura lottery kalpui a nih theih nana tihfel hma chuan May 28, 2018-a term tawp tawh lottery firm palite chu lottery kalpui chhunzawmtir tawh lo turin sorkar a phût. Tuna tender anga sorkarin kaltlangpui a tum a nih chuan a tawp thlengin MNF-in an dodal dawn thu leh, term tawp tawh firm palite lottery kalpui chhunzawmtir pawh tihtawp nghal a nih loh chuan a ṭul anga hma an lak dawn thu an sawi. (Phek 2-ah chhunzawm a ni)