IPS officer-te'n Governor an kâwm

India hmarchhak bial tlawh chhuak tura thlan Indian Police Service (IPS) officer, Sardar Vallabhbhai Patel National Police Academy-a proba­tioner mi 17-te chuan nimin chawhnu khan Governor Kummanam Rajashe­kharan chu Raj Bhavan-ah an kâwm.

Governor chuan Mizorama a la awm rei loh thu sawiin, "Tawnhriat ka la ngah tawk lo a, Mizoram chinchang ka zirchho ve mek a ni.

Mizoramah tlawmngai páwlte an chak a, mipui an hawihháwm a, nungcha leh thing leh mau humhalh an ngai pawimawh hle. Tourism lamah Mizoramin hmasawnna tur tam tak a nei," a ti.

Ṭhalaite tana zirna sang zawk a ngaih pawimawh thu sawiin Larsap chuan, "Tun hnaia Kerala-a ka zin khan, Rajdhani Group of Institutions chuan Mizoram zirlai naupang 100-te tan zirtirna a thlawna pek an inhuam thu an lo sawi a ni," a ti a; mipui hriselna leh khuarel chhiatna laka invenhimna leh a tihnêp dante a ngaih pawimawh thu a sawi.

Governor hmalakna avangin Indira Charitable Trust hnuaia Rajdhani Group of Institutions, Kerala chuan Mizoram zirlaite'n a thlawna zirna sang zawk an zir theihna turin seat 100 a pe a ni. Mizoram seat neih dan chu - Bachelor of Technology (B.Tech)-ah seat 30, Bachelor of Hotel Management and Catering Technology (BHMCT)-ah seat 50, Master of Business Administration (MBA)-ah seat 10 leh Master of Technology (M.Tech)-ah seat 10 a ni.