KHAWTHLIR

Kolasib district-in lawmman dawng
Kolasib district chuan India ram puma district hna thawh ṭhat vanga sorkar laipuiin chawimawina a siam, Skoch Order of Merit for Good Governance in District Administration-ah bronze medal an dawng a, lawmman hi district aiawhin DC Dr Arun T chuan nimin khan New Delhi-ah a dawng.Kolasib district-in lawmman an dawn chhan hi, With Temporary Software' an siam vang a ni a; he software hmang hian hnam dang Mizorama lut duh leh lut turte chu Vairengte Police check gate bulah chawp leh chilhin ILP pek nghal theih a ni.

MLA-in hawng
Kolasib Project Venga MLA fund aṭanga sak MUP building, Gosen Special School building leh Kolasib Project Veng MHIP building chu nimin khan bialtu MLA PC Zoram Sangliana'n a hawng.

Thlen theih
Mizoram sorkar chuan thuchhuah siamin, National Commission for Protection of Child Rights-in naupang harsatna tawkten internet kaltlanga lungawi lohna an thlen theihna turin POCSO e-box a siam thu tarlangin, "Internet kaltlanga pawikhawihna hrang hrang heng - cyber bullying, cyber stalking, child pornography leh a dang tuartu naupangte emaw, an nu leh pa, an thiante leh an chhungte pawhin NCPCR website www.ncpcr.gov.in ah lutin e-box ah thubuai thehluh thei a ni," an ti.

Seat 100 pe
Governor Kummanam Rajasekharan hmalaknain Indira Charitable Trust hnuaia Rajdhani Group of Institutions, Kerala te chuan Mizoram zirlai naupangte tan a thlawna zirna sang zawk an zir theihna turin Mizoram chu seat 100 a pe. Mizoram seat neih dan chu Bachelor of Technology (B.Tech)-ah seat 30, Bachelor of Hotel Management and Catering Technology (BHMCT)-ah seat 50, Master of Business Administration (MBA)-ah seat 10 leh Master of Technology (M. Tech)-ah seat 10 a ni.