Kan sorkar hunah State Day leh Remna Ni Mizoram ni pawimawhah kan dah ang - MNF President

MNF president Zoramthanga chuan nimin khan Mizo Hnam Runa inkhawmah thu sawiin, MNF-in sorkarna an chan hunah Mizoram State Day leh Remna Ni chu Mizoram ni pawimawhah an dah tur thu a sawi.

Zoramthanga chuan, MZP-te'n June 30-a Remna Ni lo thleng tur a huhoa hman an rawt chu ṭha an tih thu sawiin, "India sorkarin Independence Day leh Republic Day a ngai pawimawh ang hian MNF a sorkar hunah State Day leh Remna Ni hi kan dah pawimawh hle dawn. Congress sorkarin Remna Ni an lo theihnghilh angte kha thil zahthlak tak a ni a, Remna Ni hi Mizote tlàwmna ni tih an sawi ṭhin kha tunah chuan an sawi ṭha ngam meuh tawh lo a ni," a ti.

Pu Laldenga (L) hoa MNF-in sorkarna an chan laiin mi mitmei vêng leh hawihháwm takin sorkarna an siam nia sawiin Zorama chuan, "Hhnam sipaite khan an beihsak mipui aia chan tam an tum lo a, Zoram mipui tan an bei a, kan ram leh hnam tan an thi bawk a ni," a ti a; chutih laiin, Congress party chuan mipui rilru sûkthlêk her danglam tumin hmangaihtu der angin an lang a, hnam sipaiteah hêm an thlak niin a sawi.

Zoramthanga chuan ZPM chungchang sawiin, "ZPM hi party an ni lo a, forum an ni zawk. MNF leh Congress-te hi chuan president an nei a, chief ministerial candidate tih hi an tan sawi a ngai ve lo. ZPM tan chuan CM candidate tih hi sawi tel ngei a ngai tlat thung. A thâwka phita CM candidate tih fo hi hming tawpa B.A dah ve ziah ang hi a ni," a ti. ZPM chu unit innghahna bulfûk nei lo an nia sawiin, an tan MLA pakhat neih pawh thil har a nih tur thu a sawi bawk.