Lumpsum aided HSS-te khâr zui zel

Mizoram Government Lumpsum Grant-in-Aid Higher Secondary School Association (MIGLAHSSA) chuan adhoc aided dinhmuna dah tura sorkar an phût vanga June 18, 2018 aṭanga tiam chin awm loa sikul an khâr chu nimin thleng khan an la chhunzawm zel. Ni ruk chhung sikul an khâr tawh chhungin sorkar aṭanga thu lawmawm an la dawn loh avangin khâr chhunzawm an tum.

Hetih lai hian, Tuisualral Higher Secondary School, Sakawrdaia zirlaite chu nimin khan sorkarin hma a lak tawh beiseiin sikulah an kal a; mahse, sikul a lo la inkhâr zirna an chhunzawm thei lo. Tuisualral HSS zirlaite hian sikul kal an duh tawhzia leh MIGLAHSSA-te phût lumpsum aided HSS pakuate chu adhoc status-ah sorkarin tihhlawh­tlinsak se an duhzia lantirna thuziak an keng a ni.

Thu dawn danin, Tuisualral HSS-a Students Evangelical Union chuan vawiin aṭang hian an sikula kal ṭhin khuate - Sakawrdai, Thingsat, Vaitin, New Vervek leh Khawpuar-ahte kalin, an sikul chu dinhmun sang zawka hlangkai ngei tura sorkar ngenna leh a hláng kai thei lotu chu kumina Assembly inthlanpuiah vote lo ngam tura ngenna signature campaign neih an tum a; signature campaign-a hming ziahna list chu bialtu MLA hnenah emaw, Congress party Tuivawl North Block President hnenah emaw hlan an tum a ni.