Pollution control-ah nasa zawka Sorkar a ṭan a ṭul - Chief Minister

New Secretariat Complex-a Mizoram State Pollution Control Board (MSPCB) building thar chu nimin khan chief minister Lal Thanhawla'n a hawng. CM chuan, sorkarin tun aia nasa zawka pollution control lama hma a lak a ṭul thu a sawi.

Chief Minister chuan, MSPCB chu ram leh mipui hriselna atana hna pawimawh tak thawktu an nih thu sawiin, thawktu tam lo chunga ṭhahnemngai taka an thawh ṭhin avangin fakawm a tih thu a sawi a, "Building ṭha tak hi thawktute tiphûrtu a nih ngei ka beisei. Pollution hi khawvel changkannain a ṭha lo lam thil a ken tel a ni a, khawpui changkang zawkah phei chuan boruak a thianghlim loin hriselna atana pawi tham a ni tawh," a ti.

Mizoramah pawh pollution a nasa telh telh tih sawiin Lal Thanhawla chuan, "Kum tam tak kan thing leh maute'n tihchereu an tâwk a, Mizoram chu state dangte nen khaikhinin la hring viau mah se, ramngaw dik tak sawi tur a tlem tawh. Sorkar chuan pollution vanga sik leh sa inthlak leh mihring hriselna leh nungcha tana harsatna a thlen dan hre reng chungin NLUP kaltlangin hma a la a ni," a ti a; a bikin zirna-inah pollution control lam sawi uar ṭul a tih thu a sawi.

MSPCB building thar hi Ministry of Environment, Forest and Climate Change aṭanga sum hmuh hmanga sak niin, project amount chu cheng nuai 220 a ni a, April 24, 2015-a sak ṭan, April 2017-a sak zawh a ni.

BMSPCB hi kum 1989-ah din niin, part time chairman kaihhruaina hnuaiah a kal a, member secretary bakah board member dang paruk an awm. Boruak leh tui thianghlimna kaihhnawih dan hrang hrang zawm a nih theih nan hma an la ṭhin a, industrial pollution control te, vehicular emmission test te, air quality monitoring te, water quality monitoring-te leh bawlhhlawh sawngbawl hnate an thawk ṭhin.