Lottery tender chhuah mek titawp turin MNF party-in Mizoram sorkar an phût
L Thangmawia sawi danin, Mizoram sorkarin December 20, 2011-a lottery tender a chhuah chu firm palite'n a chhan theihna hniam ber (minimum guaranteed revenue)-in an chhang a; chungte chu - ECool Gaming Solutions Pvt.Ltd. - Rs. 10,000 (online), NV International Pvt. Ltd. - Rs. 10,000 (online), Summit Online Trade Solution Pvt.Ltd. - Rs. 10,000 (online) leh Teesta Distributors - Rs. 10,000 (paper) leh Rs. 5,00,000 (bumper)-te a ni.
Tender chhuah leh lottery kalpuitu tur thlan danah dik lo taka intiamrualna (cartelisation) a awm ngei tih Competition Commission of India leh CAG-in an chhuina report-ah a lang ve ve a; CAG report-ah chuan tender koh ṭhat leh zawk tur a nih thu ziah lan a ni. CAG report chuan NV International chu online lottery kalpui nana thil ṭul (infrastructure) nei lo, mi dang ruai chhâwng a ni tih a hmuchhuak bawk.
Mizoram lottery kalpuitu firm palite chu Mizoram sorkarin kum hnih (29.5.2012 - 28.5.2014) chhung atan agreement a siampui a, ṭum hnih a pawhseisak (extend) tawh. Pawhsei vawi khatnaah kum khat atan (29.5.2014 - 28.5.2015) pawhsei niin, a vawi hnihnaah kum thum (29.5.2015 - 28.5.2018) atan pawhseisak a ni.
Lottery agent/distributor-te hlâwkzia leh Mizoram sorkarin sum a hloh tamzia chu CAG Report 2016-ah tarlan a ni tih sawiin L Thangmawia chuan, "CAG Report-a a lan danin, kum 2012-13, kum 2013-14 leh kum 2014-15 chhungin lottery aṭanga sum hmuh pumpui chu cheng vbc,. 11834.22 a ni a, heta ṭanga Mizoram sorkara lottery distributor-te'n sum an chhûn luh chu cheng vbc. 25.45 chauh a ni. CAG Report-in a huam loh kum 2015-16, 2016-17 leh 2017-18 chhungin engzat tak lottery hralhna sum ni ang maw?" a ti.
Mizoram lottery scam lian takah chief minister Lal Thanhawla chu thûk takin a inrawlha an hriat thu sawiin Thangmawia chuan, May 12, 2017 khan Congress Bhavan-ah CM hian lottery hi CBI chhuitir MNF-in an duh chuan hma ka lo la ang tia a sawi laiin, vawi duailo MNF-in CBI chhuitir tura an bawhzui hnuah pawh vawiin thlengin a la chhuitir ngam lo," a ti a; CM-in a chhuitir ngam loh avangin thil dik lo a awm ngeia an ngaih thu a sawi.
Mizoram lottery agent-te term chu May 29, 2018-ah a tàwp avangin Mizoram sorkarin May 30, 2018-ah tender thar a chhuah tih sawiin Thangmawia chuan, "Lottery agent-te term May 29-ah a tawp dawn tih hre reng chunga an hun tawp hmaa tender an ko lo leh an term tawp hnua tun thlenga lottery an la kalpuitir reng hi hriatthiam a har hle," a ti.
L Thangmawia sawi danin, May 30, 2018-a tender chhuahah hian, a chháng thei tur chin bithliahah tender chhuah aṭanga chhiar lêta kum thum (thla 36) chhungin kum khat (thla 12) tal India ram state khawi berah emaw lottery distributor a ni tur a ni tih a tel thar a; hei hi tuna sorkar duhsakna dawngtu firm palite tan chauha kawng hawnsaknaah MNF chuan an ngai a ni.
Tender-a a lan danin, online leh paper lottery-ah minimum guaranteed revenue (MGR) chu Rs. 20,000 ve ve a ni a, bumper-ah chuan MGR chu Rs. 6,00,000 a ni thung.