Mizoramah Covid-19 vei mek mi 111 Tualchhunga inkai darh 1 hmuh chhuah a ni
June 12, Zirtawpnia swab sample endik aṭangin Covid-19 hripui vei mi pathum hmuh chhuah a ni a, June 13, Inrinnia endikte zing aṭangin mi panga hmuh chhuah a ni bawk. Heti hian result hriat tawh chinah Mizoramah hripui vei mek mi 111 an awm. June 12-a endik zinga pakhat, Mission Venga mi chu state páwn aṭanga haw ni lo Covid-19 vei hmuh hmasak ber a ni.
June 12 khan Zoram Medical College (ZMC) Covid-19 Laboratory-ah swab sample endik mi 403 zinga pathumin hripui an vei.
Hripui vei mi pathumte chu kum 24-57 inkar, Aizawl, Kolasib leh Siaha district-a mi pakhat ṭheuh an ni a; Kolasib leh Siaha district-a mite chu Mizoram páwn aṭanga tun hnaia rawn haw an nih laiin, Aizawl district-a mi chu Mizoram páwna zin chhuak lo, state chhunga awm sa a ni thung.
June 13, Inrinnia swab sample endik mi 510 zinga mi pangain Covid-19 an kai tih hmuh chhuah a ni a, mi dang 505-te an fihlîm thung.
Hripui vei hmuh thar mi pangate chu kum 25-43 inkar, tun hnaia Delhi aṭanga lo haw vek an ni a, Aizawl district mi pathum leh Siaha district mi pahnih an ni. Sample test-te chu Aizawl leh Siaha district-a mite bakah, Kolasib, Champhai leh Hnahthial district aṭanga sample lakte a ni.
Mi panga zinga pathum chu quarantine facility-a awm lai niin, pakhat chu home quarantine lai leh pakhat dang chu ZMC-a enkawl lai an ni. Mi paliin symptom an neih loh laiin, ZMC-a awm sa chuan symptom a nei.
Aizawl district-a mite chu State Referral Hospital (SRH)-ah dah luh an ni a, Siaha district-a mite chu an district-a Covid Care Centre (CCC)-ah an awm.
SRH-ah hian Covid-19 vei mi 43 enkawl mek an ni a, mipa 12 leh hmeichhia 31, kum 14-57 inkar an ni. Aizawl district mi 27, Kolasib district mi 11, Saitual district mi pathum, Mamit leh leh Serchhip district mi pakhat ve ve an ni. An zinga pahnih chu ICU-ah enkawl an ni a, ngaihtuahawm an ni lo tih SRH-ZMC Bulletin chuan a tarlang. Mi dang 41-te chu Isolation Ward-ah enkawl an ni.
Heti hian Mizorama Covid-19 vei tawh zawng zawng chu mi 112 an ni a, pakhat dam tawhin, mi 111-in an la vei mek a ni. Vei mek zinga mi 43 chu SRH-ah enkawl mek an nih laiin, mi dang 68 chu an district-a CCC-ah enkawl an ni.
ZMC Laboratory-a June 12-a endik, June 13, Inrinnia result tihchhuah zingah Mission Veng pa pakhat, state páwna tangkhang rawn haw, Bairabi rél chawlhhmun aṭanga an district-a hruaitute zinga mi chuan Covid-19 a vei tih hriat a ni a; state pawn aṭanga rawn haw ni lo zinga hripui kai hmasa ber a ni.
Mission Veng Local Task Force (LTF) chuan an veng mi state pawna zin ni lo Covid-19 kai hmuhchhuah a nih avang hian veng mite páwna chhuak lo leh fimkhur turin an inhriattir a, Health department lam chuan contact tracing an ti nghal. Inrinni zan khan Mission Veng mi 34 chu endik turin an swab sample lâk a ni a, an quarantine nghal vek bawk a; a hmaa an lo inentirna Aizawl Hospital & Research Centre-a thawk mi 29-te sample lâk a ni bawk.
Mission Veng LTF hruaitute hnen aṭanga thu dawn danin, an venga hripui kai hi Transport department bus enkawltute zinga mi, May thla tàwp lama state páwna Mizo tangkhang rél hmanga rawn hawte an district lama hruaitute zinga mi a ni.
Inrinhlelhna a neih avangin June 2-ah helpline 102 (toll free) an bia a, a fanu nen ZMC-ah kal nghalin, swab test neih an dil. ZMC lama official-te erawh chuan sorkarin kal dan tur a tihah khawsik leh thawhah nei lo an endik theih loh thu lo hrilhin, swab test chu an tihsak lo. Chumi ní vêk chuan R Dengṭhuama Hall, Mualpuiah kal lehin, RAT test an tihtir a, RAT-ah chuan non-reactive (negative) a ni. Chuvang chuan, ngaihṭha takin a awm zui ve mai niin an sawi.
A khua a sik zui avangin June 8, 2020-ah Aizawl Hospital & Research Centre-ah an inentir a, Covid-19 thilah ngaihṭhat lohna an nei lo. June 10, Nilaini chawhmaah Aizawl Hospital-ah bawk an inentir leh a, result-ah chuan zun kawnga hnái la nasa leh blood sugar sáng a ni a, chawhnu lamah Aizawl Hospital-ah admit zui a ni. Rei an awm hmain fimkhur thilah a fanu nen ZMC-ah hruai nghal an ni. Inrinni zinga result chhuakah Covid-19 a vei tih hriat a ni a, a tir aṭanga amah hruaitu a fanu erawh chuan a vei lo thung.
Aizawl Hospital chuan an damdawi-in chu tlawhpawh theih a nih rih loh thu an puang a; Aizawla veng hrang hrangte chuan tun hnaia Aizawl Hospital-a kalte chu LTF hnenah inhriattir turin an thuchhuah an siam bawk.
Hetihlai hian Transport department hnuaia driver leh conductor, tun hnaia Bairabi aṭanga tangkhang phurtute chu Inrinni khan Zonuama Mizoram UPC Assembly Centre-ah dah khawm nghal an ni. Driver leh conductor-te hi RTPCR hmanga an swab sample endik vek an nih a, an result an hriat hma chu he hmun chhuahsan lo tura tih an ni.