Ruihhlo hi ram hmasawnna Ti ṭhuanawptu a ni - CM

Nimin kha ruihhlo hman khawloh leh tawlh­ruk dona ní, International Day Against Drug Abuse & Illicit Trafficking a ni a, Lammualah ruihhlo man sa tam tham tak hâl ral a ni. Khuallian, chief minister Lal Thanhawla chuan, ruihhlo chu ram hmasawnna tiṭhuanawptu a nih thu a sawi.

International Day Against Drug Abuse & Illicit Trafficking hmanna inkhawm hi Social Wel­fare secretary K Vanlal­rawni'n a kaihruai a; Chief Minister chuan, ruihhlo chi hrang hrangte chu ram hmasawnna tiṭhuan­awptu, mihring hrisel loa siamtu leh khawtlang tibawlhhlawhtu a nih thu sawiin, "Ruihhlo do hi mi tin mawhphurna a ni. Sorkar angin nasa taka hmalak niin sum sên a ni tawh a, sêng mek niin, a ṭulnaah sen belh zel ni ang," a ti.

Ruihhlo laka fihlim leh tawlh­rûk do chu sorkarin a ngaih pawimawh avangin tlawmngai pawl leh kohhrante nen thawhhona neia hmalak zel a nih thu sawiin CM Hawla chuan, "Mizoram police-te'n Assam Rifles leh BSF-te nen ṭangkawpa ruihhlo leh a tawlhtute an man fo ṭhin," a ti a; ruihhlo do rêm tak tak turin tuna ṭhalaite'n ruihhlo laka filhlim duhna leh tumna rilru an put a pawimawh thu a sawi.

Lal Thanhawla chuan, zirlaite chu mahni kea ding thei an nih theihna atan an nun uluk turin a chah a, "Chumi atan chuan nu leh pate thu awih, aia upa zah nachang hriat, inngaihtlawmna an nunah an chhawm nun zel a pawimawh," a ti.

Chief Minister hian Interna­tional Day Against Drug Abuse & Illicit Trafficking puala sikul naupangte tana placard siam intihsiaknaa tiṭha pathum hnen­ah lawmman a sem.

Lawm­man dawngtute chu - pakhatna KM Higher Secondary School, pahnihna MICE leh pathumna Chaltlang High School-te an ni.

Khualzahawm, School Edu­cation minister H Rohluna chuan, ruihhlo vanga harsatna hrang hrang Mizoramin a tawh te, ruihhlo bawiha táng mekte dinhmun leh hmalak zel dan tur uluk taka kan ngaihtuah thar a ṭul thu sawiin, "Naupang zinga ruihhlo laka invenna thuchah leh inzirtirna hi thil hmanhmawhthlak a ni. An himna chu mi tam zawk himna, hnam pum himna a ni ang," a ti.

Inkhawmah hian zirlai kal­khawmte'n HSLC 2017 topper Lalremsiama Darchhun kaihhruaina hnuaiah ruihhlo ti lo turin thu an tiam a; Miss Mizoram 2017 Rody Vanlalhriatpuii, footballer Jeje Lalpekhlua leh zaithiam TBC Zaithanpuia ten thu an sawi bawk.

International Day Against Drug Abuse & Illicit Trafficking puala inkhawm buatsaih a nih hma hian Chief Minister-in Lammuala volleyball court-ah Excise & Narco­tics department-in ruihhlo an mante a hâl ral.

Ruihhlo hâl ralte chu heroin kg. 4.388 a ni a, cheng nuai 84.37 hû a ni. Kumin hian ruihhlo hâl khu buaipui awm tham a nih lohna turin ruihhlo hâl ral zat hi tihtlem a ni.

United Nations General Assem­bly chuan December 7, 1987 khan khawvela ruihhlo hman khawloh leh a tawlhrûkna dona ni atan June 26 a puang a, khawvel pumah hman ṭhin ni se, tih a ni a; kum 1998 aṭangin khawvel ram hrang hrangah sorkar, mipui vantlang leh pawlte'n an hmang ṭan a ni.