ART-ah HIV+ve 7,007 an inziak lut tawh

Mizoram State AIDS Control Society (MSACS) chuan, nimin khan Anti Retroviral Therapy (ART) review meeting an buatsaih a; HIV hrik pai ART-a inziak lut tawh mi 7,007 an awm a, ART la tawh zinga mi 1,208 leh ART la la lo HIV hrik pai mi 653 an thi tawh tih tarlan a ni.

Review meeting-ah hian April 2017 aṭanga March 2018 chhunga ART Centre-te hmalakna leh dinhmun thlirho a ni a; Mizorama ART centre paruk (6)-a thawktute leh Aizawl, Champhai leh Lunglei district-a AIDS Prevention and Control Unit-a thawkte an tel.

MSACS project director Dr Lalmalsawmi Sailo chuan, ART dam­dawiin taksaa HIV hrik inthlahpung zel tur a khuahkhirh avangin ART damdawi chuan Mizorama HIV darh zel tur nasa takin a veng tih a sawi a, "ART damdawi la ei lote leh ei chhunzawm loa tàwpsan, loss to follow up (LFU)-te hi kan rama he natna kai darhtute an nih avangin thawktute kan ṭan lehzual a ngai a ni," a ti.

Meeting-a tarlan danin, HIV positive zingah ART damdawi ei tawh mi 7,007 an awm a; HIV+ve zinga ART damdawi lak mek laia thi mi 1,208 an awm a, ART la tawh, mahse, ei chhunzawm lo zinga thi nia chhinchhiah mi 653 an awm.

ART damdawi ei tawh si, ei chhunzawm lo (LFU) chhinchhiah zat chu mi 1,317 an ni a, damdawi ei ṭan hmaa chhui zui theih loh HIV+ve mi 1,427 an awm bawk.

ART Centre hi Aizawl Civil Hospital, Kulikawn Hospital, Lunglei Civil Hospital, Champhai District Hospital, Kolasib District Hospital leh Mamit District Hospital-ahte din a ni tawh.

ART Centre hrang hranga enkawlna la mek HIV+ve zat leh inziak lut tawh aṭanga enkawl mek zat percentage chu - Aizawl Civil Hospital-ah 58 (13%), Kulikawn Hospital-ah 103 (23%), Lunglei Civil Hospital-ah 58 (13%), Champhai District Hospital-ah 61 (14%), Kolasib District Hospital-ah 76 (17%) leh Mamit District Hospital-ah 86 (20%) an ni.