Tuikhuahah naupang 3 tla hlum

June 25, Thawhṭanni tlai khan Haulawng khuaa Horticulture depart­ment Centre of Exce­llence chhunga tuikhuahah Haulawng Saichhoh Veng naupang pathum an tla hlum a, nimin khan vui an ni.

Thu dawn danin, Cen­tre of Excellence chhung­ah hian tlai lamah naupang pasarih vel an kal a, a enkawltute'n Centre chhungah kal phal a nih loh thu an hrilh hnuah an kîr ve leh mai emaw tiin hna an thawhsan leh a ni. Mahse, naupangte chu greenhouse châwmna tura siam tuikhuah, ft. 35-a sei, ft. 27-a zau leh ft. 6 vela thûkah chêngin an tla hlum ta nia hriat a ni. Centre chhunga kal ve naupang pakhat chu inah tlân hawin, a ṭhiante an tlak hlum thu a chhungte a hrilh niin an sawi.

Tuikhuaha naupang tla hlumte chu - Lalhma­ngaihzuala (10) s/o Shar­ma Lalmuankimi, Jacob Lalrinpuia (8) s/o Lal­nunsanga leh Lalrin­nunga (6) s/o Lalvulluaia te an ni.

Tuikhuaha tla hlum chhungte chu Horticul­ture minister PC Lalthan­liana'n Rs. 5,000 ṭheuh a pe a, Horticulture depart­ment-in Rs. 10,000 ṭheuh an pek bakah, Haulawng Branch YMA hnenah Rs. 5,000 an pe bawk.