KHAWTHLIR

Thisen pe
Helen Lowry Higher Secondary School NSS chuan, nimin khan an sikulah blood donation camp an huaihawt a, Aizawl Civil Hospital tan mipa 49 leh hmei­chhia pariatte'n thisen unit 57 an pe.

Serchhip- Keitum Lirthei tlân dan tur
Serchhip DC Sangchhin Chinzah chuan thupek chhuahin, Sailiam kâwn leh Keiṭum inkar NH-54 siam meka lirthei tlân dan tur a ruahman thar. June 26 aṭanga thu leh awm hma chu zing dar 6-9 inkar, chawhma dar 10:30 leh chawhnu dar 1:00 inkar, tlai dar 2:00 leh tlai 4:30 inkarahte khâr a ni ang a; chawhma dar 9:00 - 10:30 inkar, chhun dar 1:00 - 2:00 inkar leh, tlai dar 4:30 - 6:00 inkarahte hawn a ni ang.

Result lawm
St. Joseph Higher Secondary School chuan nimin khan Hrangbana College Golden Hall-ah kumin HSLC leh HSSLC result chhuaka result an neih ṭhat an lawm a, minister Zo­dintluanga leh Lengzem editor Vanneihtluanga ten an hmanpui.

Mei zu vai
Lunglei District Anti Tobacco Squad-te chuan, nimin khan Lunglei khawpuiah puipunna hmuna mei zu an awm leh awm loh an enfiah a, phal lohna hmuna mei zu mi pakhat manin, pawisa an chawitir. Office ­chhung leh páwna puipunna hmuna hriattirna (signage) tár lote chu a hma thei ang bera tár turin an hriattir bawk.

Vawiinah session
Vawiin chawhma dar 10:30 hian Mizoram Legislative Assembly session ṭan a ni dawn a, naktuk­ah chhunzawma zawh nghal tum a ni. Tun ṭum session-ah hian Home department aṭangin Citizenship (Amendment) Bill, 2016 duh lohna resolution a luh beisei a ni a; House-a pass turin Sinlung Hills Council dinna tur, The Sinlung Hills Council Bill, 2018 leh sorkar leiba ṭhìnna tur, Public Demand Recovery (Amendment) Bill, 2018 a lut a ni.