CYMA-in Myanmar-a ruihhlo zuarte an kâwm

Central YMA hruaitute chuan, Mizorama ruihhlo hluar lutuk chungchangah June 25, 2018 khan Myanmar ram chhunga Ṭiau kama khua, Khawmawiah ruihhlo zuar liante an kâwm a, an thil tih sim turin an ngen.

Central YMA hruaitute hi Myanmar-ah hian president Vanlalruata hoin an kal a; CYMA assistant secretary Peter Chhakchhuak, finance secretary Fabian Lalfakawma leh Central Executive Committee member dang pasarihte leh Zokhawthar Branch YMA hruaitute'n an ṭawiawm.

Mizorama ruihhlo - heroin lut zawng zawng deuh thaw (99% vel) chu Myanmar aṭanga lak luh nia hriat a ni a; Central YMA-in ruihhlo zuartute'n an zawrh tawh lohna tura hmalak ṭha a tih angin, a vawi khatna atan Myanmar ram chhungah an khawtlang hruaitute thawhpuiin ruihhlo zuarte an kâwm a, zuar tawh lo turin an ngen a ni.

Khawmawia ruihhlo zuartu lian tak tak mi 15-te chu Khaw­mawi administrator (V/C) leh RLYA (NGO) kaihhruainain khawtlang rorelna-inah an kâwm a; CYMA hruaitute chuan, Mi­zo­ramah ruihhlo vangin ṭha­lai eng emaw zat, mi 1,500 vel an thih tawh thu leh sang tam tak home/centre-ah enkawl mek an nih an sawi.

CYMA hruaitute chuan, Mizoramah ruihhlo vangin rûkrûk a hluar thu te, naupang tê tê ruihhlo ti thar an tam thute sawiin, Mizo mipuiin ruihhlo chu theihtawp chhuaha tihrêm an duh tawh thu an sawi a; ruihhlo zuarte chu sim ngei tura ngenin, an sim lo a nih chuan a ṭul anga Khawmawi khawtlang hruaitute nen Myanmar thuneitu - police/sipai kutah an hlan ṭhin tawh tur thu an hrilh a ni.

Central YMA hruaitute hian meeting-a tel lo, ruihhlo zuartu ṭhenkhatte chu an chenna inah kal chilhin, ruihhlo zawrh sim turin an ngen bawk.

CYMA thuchhuah chuan, Myanmar rama ruihhlo zuartute an kawm theihna tura Khawmawi khawtlang hruaitute'n an lo ṭawiawm leh rem an ruatpui avangin lawmawm an tih thu a tarlang a; hun lo kal leh zel turah ruihhlo donaah thawhhona ṭha tak neih an inhuam avangin lawmawm an tih thu an sawi bawk.