Zirlai pawl 10-in MIGLAHSSA thláwp

Lumpsum grand-in-aid higher secondary school awmna khaw pakuaa zirlai pawl 10-te chuan thuchhuah

inṭâwm siamin, Mizoram Govt. Lumpsum Grant-in-Aid Higher Secondary School Association (MIGLAHSSA)-in adhoc aided dinhmuna hlankai phûta sikul an khar mek chu an thlàwp tlat thu an tarlang.

Thuchhuah inṭâwm siamtute hi Sakawrdai Students' Union, Phullen Students' Union, Farkawn Students' Union, N.E. Khawdungsei Students Union, MZP sub-hqrs. East Lungdar, Thingsulthliah Students' Union, MSU Sub-Hqrs. Zobawk, Zobawk Branch MZP, MZP sub-hqrs. West Phaileng leh MZP hqrs. Zawlnuam-te an ni.

Zirlai pawl 10-te chuan, MIGLAH­SSA-in sorkar an ngenna tihhlawhtlin a nih loh vanga Tuisualral HSS, Phullen HSS, Farkawn HSS, NE Khawdungsei HSS, East Lungdar HSS, Thingsulthliah HSS, Zobawk HSS, West Phaileng HSS leh Zawlnuam HSS-te chawlhkar khat chuang khar a ni ta chu pawi an tih tak zet thu an tarlang a, "Heng sikul hrang hranga kan zirlaipui mi 850 vel zetin zirna an dawng thei lo hi thinlung takin kan tawrhpui a ni," an ti.

Zirlai pawlte chuan, HSS pakuate chu din a nih aṭanga tun thlengin khawtlangin sum thawh khawma an la enkawl zui zel an ni tih sawiin, "Kum-14 chhung khawtlangin an lo enkawl tawh, an phurrit chhawk tura Managing Board, V/C, NGO leh MIGLAHSSA-te'n sorkar an ngenna hi a âwm kan ti," an ti a; an ngenna chu ngai pawimawh a, a rang lama tihhlawhtlinsak ngei turin sorkar an phût tih an sawi.

Zirlai pawl 10-te chuan, adhoc grant-in-aid ngiata MIGLAHSSA leh khawtlang hruaitute hmalakna chu an thlawp tlat tih sawiin, "An hmalakna hi a hlawhtlin hma loh chuan theihtawp chhuaha a ṭul ang anga hmalakpui zel kan inhuam a ni," an ti.

Tarlan tawh angin, MIGLAHSSA hian an sikul pakuate chu adhoc aided dinhmuna dah phûtin June 18, 2018 aṭangin sikul an khâr ṭan a, tun thlengin an la khâr zel a; ni sarih chhung chu zirlai 850 velin zirna an chhunzawm thei lo tawh a ni.