PIGFED-in inkhawmpui an hmang

Mizoram Pig Pro-ducers’ Cooperative Fe-deration (PIGFED) Ltd. chuan, nimin khan Aizawla Vety Poly­clinic Hall-ah inkhawm­pui an hmang a; AH&Vety minister C Ngunlianchunga'n a hmanpui.

C Ngunlianchunga chuan, ran vulhte uluk leh fai takin enkawl a pawimawh thu sawiin, "Kan vulh dan enfiah a, tun aia felfai zawka enkawl tura ṭan lak a ngai. PIGFED hnuaiah society hrang hrang an awm a, eng nge society hian kan thawh chhuah ve tih ngaihtuah chian a ngai a, society awm chhan hre rengin mi pakhatin a tih theih loh hi tam zawkin ṭangrualin kan ti thei a ni tih kan hriat reng a ṭul," a ti.

PIGFED chu federa­tion pawimawh tak a nih thu sawiin AH&Vety Minister chuan, "Vawk vulh hi eizawnna tlin a ni. Ram dang aṭanga ran vulhte la lut loin keimahni zawk hi a pe chhuaktu nih tum ang u," a ti a; Mizoramin vawk note tam zawk a neih theihna atan Thingsulthliah, Thingdawl, Lunglei (Lungpuizawl), Lawng­tlai (Mampui) leh Selesihah hmalak a nih thu a sawi.

Inkhawm hi PIGFED chairman F Zosanga'n a kaihruai a, managing director Dr Lalnunhlima Ralte-in PIGFED hnathawh leh hmalakna hrang hrang a tarlang.

PIGFED hi June 6, 1989-ah din a ni a, affi­liated society 184 awmin, member 5,000 chuang an awm. An hmalakna ber chu, vawk vulh leh a kaihnawih thil hrang hranga member-te hmasawnna tur a ni a, kum 2017-18 chhung khan vawkpui 3,778 kah rai niin, vawk notê 15,692 thar chhuah a ni.