Lei dawh chak turin sorkar phût

MNF treasurer Van­lalzawma, MLA chuan, kumin June thla chhunga thawh zawh tura tih, Upper Khatlaa Mahatma Gandhi Road-a lei dawh hna thawh mek­ah chak taka hma la turin sorkar an phût thu a sawi.

Vanlalzawma hian nimin khan Mizo Natio­­nal Women Front (MNWF) headquarters huaihawta Khatla South YMA Hall-ah Aizawl West-III MNWF Workers Meet a hmanpuinaah thu sawiin, "MG Road kawng hi a bik takin Aizawl West-III mipui tan phurrit min siamtu a ni a, June thla chhunga lei dawh zawh tura tih ni si, tun dinhmun chu he ti hi a ni bawk si a, kan sorkar hi chak taka hma la turin kan phût a ni," a ti.

Aizawl West-III huam chhunga Convention Centre sakna tur laih vanga Upper Khatla kawngpui rei tak hman theih loha a awm tawh chungchangah Vanlal­zawma chuan, "MNF MLA-te'n a hmunah kalin bailey bridge dawh ni se, kan ti a, chutah chuan sorkar an harh chhuak ve chauh a ni," a ti a; sorkarin hma a lak zui dan erawh a muang hle tih a sawi.

MNF Treasurer chuan, "Pathian leh mipui zarah kan sorkar ngei dawn a, mipui leh ram tan hna tak tak kan thawk ang a, Pathian kan dah pawimawh hmasa ber dawn a ni," a ti bawk.