RT-PCR leina tur pek ka tum a, sorkarin a hnar - Duhoma
ZPM Legislature Party (ZLP) leader Lalduhoma chuan June 13, Inrinni khan thuchah a tichhuak a; RTPCR leina tur pek a tum ṭumin sorkarin a hnar thu a sawi.
Endik tur a tam a, RT-PCR kháwl pakhat chauh, hawh chawp lehnghal ringa state sorkar a awm chu a fel loa a hriat avangin June 1, 2020-ah a leina tur pek a duh thu sorkarah a thlen tih sawiin Lalduhoma chuan, "A ngai an tih loh thuin chhàn ka ni a, mak ka ti hle," a ti.
ZLP Leader chuan, Mizoramah RIPANS, Mizoram University, PUC leh College of Veterenary Science & Animal Husbandry, CAU ten coronavirus en theihna kháwl an nei tih sawiin, "Mizoram sorkar erawh chuan a lo neih loh avangin, hri a lo lên khan kan test ve mai thei lo a ni," a ti a; a tirah MZU leh PUC-te ta hawh a ni a, test kit nen a inmil loh avangin CVSAH ta hawha hman a nih thu a sawi.
Lalduhoma chuan, kháwl lei leh swab sample endik kawngah Mizoram chu a vuaichà ber a ni tih sawiin, "Revenue Deficit Grant kan dawn tur nuai 11,850 a hun takah thla tin kan dawng a, June thlaah pawh kan dawng leh tawh. Tangkhangte buaipuina tur PM CARES aṭangin June 9 khan kan dawng bawk. Kan Finance Minister hi ama ṭawngkam ang ngeia mamawh apiang leina tur sum pe zung zung tur leh damlo apiang tana pek tur cheng nuai 2 a dah kha Covid-19 veite pe vek turin ka ngen a ni," a ti.
Lalduhoma chuan, ZMC hi medical college puitlinga pawm a la ni lo a, medical college puitling ni tur chuan Viral Research Diagonistic (VRD) laboratory a neih ngei a ngai tih sawiin, "VRD laboratory chuan PCR hi a keng tel. Tuna mi ta hawhte hi pêk kîr a la ngai dawn a, sample test nan leh college puitlinga pawm a nih theih nan keimahni puala PCR kháwl kan neih vat hi tihmâkmawh a ni," a ti a; kumin March thla aṭangin PCR khawl lei tum thâwm awm tawh mah se, tun thlengin lei a la nih loh thu a sawi.
ZNP Leader chuan, automated RNA extractor chu RT-PCR hmanga swab sample test tichaktu a nih thu sawiin, PCR kháwl hawh rualin lei nghal awm tak ni mah se, nei loin hun eng emaw chen an kal thu a sawi a, "Lei a harsa lo a ni ang, June 8-a an chah kha June 10-ah a lo thleng nghal mai a, June 11 aṭangin hman a ni," a ti a; extractor hman tel a ni ta chu lawmawm a tih thu a tarlang.