World Blood Donor Day hmang

Nimin June 14 kha World Blood Donor Day (WBDD) a ni a, he ni pual hian Mizoram State AIDS Control Society (MSACS) leh Association for Voluntary Blood Donation (AVBD) chuan TV programme an buatsaih a, nizan khan cable TV-ah tihchhuah a ni. Kumina Day thupui chu 'Safe Blood, Saves Lives' (Nunna chhan nan thisen thianghlim) tih a ni.

World Blood Donor Day puanna hun hmanah hian MSACS project director Dr Lal­thlengliana'n inlawmna thu a sawi a, AVBD general secretary Lalrinkima'n kum 2019-20 chhunga thisen pek kawnga Mizoram dinhmun tlangpui a sawi.

Mizo footballer langsar leh India team captain pawh lo ni tawh Jeje Lalpekhlua leh Vanglaini joint editor Lalnghinglova Hmar ten thisen pek kawnga mipui fuihna thu an sawi bawk.

AVBD General Secretary tarlan danin, thisen pek zat hi kum tin a pung a, kum 2019-20 financial year chhunga pek zat chu unit 30,448 a ni a, chu'ng zinga unit 27,676 chu a thlawna pek (voluntary donation) a ni a, 90.90% a ni.

Kum 2019-20 chhunga pawl hlawm hrang hrangte thisen pek dan chu - kohhran ṭhalai pawlte pek zat unit 7,979, zirna-in (NSS)-te pek zat unit 6,450, YMA branch/joint hrang hrangte pek zat unit 2,558 leh pawl dangte pek zat unit 3,256 a ni a; pawl hming ni lo, mahnia pek (individual donation) aṭangin unit 7,433 pek a ni bawk. 

World Blood Donor Day pual hian Lawng­tlaiah chuan Inrinni khan hun hman a ni a, nikum June 14 leh kum­in June 14 inkara pawl leh kohhran thisen pe ṭha zual pathum hnenah chawimawina an hlân. June 14, 2019 leh June 13, 2020 inkarah Lawng­tlai district-ah blood donation camp vawi 38 neih a ni a, camp aṭang hian thisen unit 806 pek a ni.

Chawimawina an hlante chu Region HSS NSS (thisen unit 116), ṬKP Thingfal Bial (unit 63) leh LIKBLTP Vengpui & Bazar Bial (unit 62)-te an ni. Chawimawina hlan inkhawm zawhah thisen pek rûnpui buatsaih nghal a ni a, Lawng­tlai Electric Veng ṬKP unit-te'n District Hospital tan thisen unit 29 an pe a, petute mipa 25 leh hmeichhia pali an ni.

World Blood Donor Day hi World Health Organization (WHO)-in khawvel huapa ni pawimawh bik a puan pariat zinga pakhat a ni a; blood group hmu chhuaktu Dr. Karl Landsteiner-a pian champha June 14 chu WBDD atan kum 2004-ah puangin hman ṭan a ni. Mizoramah chuan kum 2007-ah hman ṭan a ni thung.