CAB/CAA dodalin MZP leh NESO-in Aizawl khawpuiah flag dum an târ

MZP leh North East Students' Organisation (NESO)-te chuan nimin khan Aizawlah Black Day an hmang a, khawpui chhung hmun hrang hrangah Citizenship Amendment Bill/Act dodalna vanga hmarchhak zirlai, nunna chánte leh tuarte thlavang hauhna lantir nan flag dum an tár.

Flag dum tár tura thawk chhuakte an kal darh hmaa inkhawm tawi, MZP Pisapui kawta neihah MZP general secretary Lalnunmawia Pautu, NESO finance secretary Ricky Lalbiakmawia leh Jawaharlal Nehru University (JNU), Delhi-a zirlai Lawmsangzuali ten thu an sawi.

MZP General Secretary chuan, CAB chu dodalna tam tak karah pass a nih avangin hmarchhak state mai ni lo, India ram chhung hmun hrang hrangah dodal a ni tih a sawi a, "CAA dodalna vanga Tripura-a kan Zo hnahthlakpui boral chu MZP-in a tawrhpui tak zet a ni. Heng zawng zawng thlentirtu leh a bul tumtu chu central-a BJP sorkar an ni," a ti.

Lalnunmawia Pautu chuan, CAB pass a nih hnua dodalna vanga central zirna-in hrang hrangah Mizo zirlaite bakah hmarchhak zirlaite thisen a chhuak tih sawiin, "Thisen chhuak leh man hial tâwk an awm avangin BJP sorkar chêt dan kan dem tak zet a ni," a ti a; MZP chu Mizo zirlaite tana ding a nih angin, Mizoram chhung leh páwna zirlaite harsatna leh buaina chu a en liam mai dawn lo a, zirlaite tan an ding zel dawn tih a sawi.

NESO Finance Secretary chuan, CAB chu pass ni tawhin, dan (act) ni tawh mah se, a tawp thlengin NESO-in an dodal zel dawn thu a sawi a, "NESO chuan CAA hi Supreme Court-ah a khing mek a, January 22 hian a ngaihtuah dawn. Court hian dan phuahchawp CAA hi a hnâwl ngei theihna turin Mizo mipuite ṭawngṭainaa hre reng turin kan sáwm. NESO chuan hmarchhak zirlaite thlavâng hauh nan hmarchhak state zawng zawngah flag dum târ hnatlang kan nei a ni," a ti.

JNU-a zirlai Lawmsangzuali pawhin thu sawiin, "MZP-te'n phai lama zirlaite harsatna min hriatthiampui bakah, Delhi police chêt dan demna leh kut an thlak vanga min tawrhpuizia lantirna leh thlavang hauhna atana NESO bultuma hmarchhak puma flag dum an tár hi thlamuanthlak ka ti hle a ni," a ti a; CAA dodalna vanga Delhi police-te'n dimdâwina tel miah loa hmeichhia pawh an man leh kut an thlak chu hreawm an ti a, an rilru a nat tak zet thu a sawi bawk.