Vawiin YMA Day Ṭanpui ngaite ṭanpui turin CYMA President-in chah

Vawiin, June 15 hi Young Mizo Association (YMA) din champha vawi 85-na a ni a, Covid-19 hripui léng vangin kum dang angin lawm theih a ni dawn lo. Central YMA president Vanlalruata chuan YMA branch-te chu ṭanpui ngaite ṭanpui turin a chah.

Vanlalruata hian nimin khan YMA Day pualin thuchah a tichhuak a, "Pathianin a missionary-te kaltlanga Mizote a ro min pek zinga ropui leh hlu ber pawl YMA chuan a din champha vawi 85-na a thleng ta. Ram chhung leh páwnahte YMA hi ṭangkai takin a inzár pharh ṭha hle. Hri­pui léng avangin kum dang angin YMA Day kan hmang thei lo hi a pawiin a khawharthlak hle mai a, hripui laka Mizoram a him theih nan a venhim hna thawktu zawng zawngte a bik takin YMA Day chibai ka bûk che u," a ti.

YMA chu ṭanpui ngaite ṭanpuitu pawl an nih thu sawiin CYMA President chuan, "A rem­chan dan angin branch YMA-te'n ṭanpui ngaite ṭanpui hrâm hrâm ni se a duhawm," a ti a; hripui léng vanga chhuanchham an awm loh nan mahni branch an huam chhung ṭheuh vil uluk turin a chah. 

Vanlalruata chuan, YMA kumpuan 'Zirna uar' chu Mizoram mamawh tak a nih avangin, tunlai boruak hre reng chungin theihtawpa bawhzui turin YMA member-te a chah a, "Zawlbûk a awm tâk loh hnu pawha theih ang anga chhunzawmtu YMA hian Mizo nun ze mawi vawng nung zelin, kan ram leh hnam hmelma - zu leh ruihhlo te, hlemhlêtnate huaisen takin i do zel ang u," a ti.

CYMA President chuan, YMA chu Zo fate hmasawnna ngaihtuahtu páwl a nih thu sawiin, "Kan khawtlanga hmasawnna hna thawhte pawh vil uluk chhunzawm zel ni se," a ti a; kumina YMA Day danglam bik tak chu YMA hlutzia hriat nawntirtu, YMA tichak leh zual tura tha thar petu ni se a duh thu a sawi.

Covid-19 léng vangin kum­ina YMA Day hi branch hrang hrangte chuan intihhlimna leh hnatlang hmangtein an lawm thei dawn lo a, branch tam tak chuan he ni pual hian thisen an pek bakah, ṭanpui ngaite an ṭanpui dawn a ni.

Tun dinhmunah YMA-ah hian branch 805, group 48 leh sub-headquarters panga a awm a; member mipa 2,63,649 leh hmeichhia 1,82,974, an vaiin 4,46,623 an awm mek a ni.