Assam Rifles sawn chhuah dan tur CM Zorama'n Amit Shah a sawipui

Chief minister Zoramthanga chuan November 22, Thawhṭanni tlai khan Union Home minister Amit Shah chu Delhi-a a chenna inah a kâwm a, Aizawl khawpui laili aṭanga Assam Rifles sawn chhuah chungchang leh Mizo­ram mamawh dangte a sawipui.

Sorkar thuchhuah tarlan danin, CM Zoramthanga chuan, Aizawl khawpui laili aṭanga Zokhawsanga Assam Rifles insawn chhuahna tur chu harsatna hrang hrang avangin hun tiam chhunga an insawn chhuah hman loh dan a sawi a, chumi avanga khawpui chhunga hmasawnna ruhrel din tura an ruahman tawh ṭhenkhat a tihkhawtlai phah thu a thlen a ni.

Zoramthanga chuan, economy tihhmasawnna tura hmalakna pakhat bamboo development kalpui mek chu a hlawhtlinna atan link road a pawimawh thu sawiin, link road siam turin sorkar laipui ṭanpuina Mizoramin a mamawh thu a sawi.

Chief Minister hian Union Home Minister hi economy kaihhnawih thil dangte a sawipui bakah, kum 1986-a India leh MNF inrem hnua MNF returnee-te tana in leh lo dinna tur puihna, housing assistance pek chungchang a sawipui bawk.

Home minister Amit Shah chuan, Chief Minister Zoram­thanga thil thlente chu lo zir chiang a, hmalak theih dan awmte ngaihtuahin remchang hmasa bera sawi dunpui leh a tiam niin sorkar thuchhuah chuan a tarlang.

Chief Minister hian Thawh­ṭanni vêk khan Sweden Embassy-a minister counsellor Gautam S Bhattacharyya a kâwm bawk a, sahimna zawnga Myanmar aṭanga Mizoram rawn lutte chungchang leh mau tihhmasawn chungchang a sawipui a ni.

CM Zoramthanga hian NITI Aayog vice chairman Dr Rajiv Kumar pawh a pisaah kâwmin, Mizoram economy tihhmasawn kawnga pawimawhte a sawipui a; hmarchhak state-te'n sorkar laipui aṭanga an sum hmuh tur ang pek thuai an nih theih nan hmalak ni se a duh thu a sawi.

Chief Minister hi State Planning Board vice chairman H Rammawi, adviser to CM (technical) K Lalsawmvela leh sorkar official dangte'n an ṭawiawm a ni.