Larsap, PWD leh LRS official-te'n KMMTTP chungchang an sawiho

Governor Hari Babu Kambham­pati chuan nimin khan Raj Bhavan-ah Mizoram sorkara PWD leh Land Revenue & Settlement department hotute a kâwm a, Kaladan Multi Modal Transit Transport Project (KMMTTP) chungchang a sawipui.

Inkawmhonaah hian PWD hotu­te'n powerpoint hmangin KMMTTP kawngpui sialnaa thlen chin leh harsatnate an sawifiah a; LRS department hotute'n land acquisition chungchanga hmalakna kal mekte an sawi bawk. KMMTTP hi sorkar laipuia Ministry of External Affairs (MEA) hmalaknaa kalpui a ni.

Larsap Hari Babu Kambhampati chuan, Mizoramin project pawi­mawh tak pahnih KMMTTP leh rél kawng siam hna a nei mek tih sawiin, "Heng project pahnihte hi Mizoram leh hmarchhak tan mai ni lo India tana project pawimawh a ni a, siam zawh thuai hi Mizoram tan a pawimawh em em a ni," a ti.

KMMTTP leh Mizoram chhunga rél kawng siamte chu zawh thuai a nih theih nan sorkar laipui dàwr a ngai a nih chuan theihtawp a chhuah dawn tih Governor chuan a sawi a; KMMTTP peih a nih theih nan Mizorama hna thawh zawh mai a tâwk lo a, Myanmar ram chhunga hna thawhte pawh peih tho a ngaih avangin MEA-ah ngenna a siam dawn tih sawiin, siam zawh a nih chuan Mizoram leh Kolkata inkar chu tuna kawng hman mek aiin a chanvein a tâwi dawn tih a sawi bawk.

PWD hotute sawi danin, KMMTTP-ah hian sector panga a awm a; Lawngtlai - Zorinpui (km. 87.51), Zorinpui - Kaletwa (km. 45), Kaletwa - Paletwa lawng chawlhna (km. 60.70), Paletwa lawng chawlhna - Sittwe lawng chawlhna (km. 150) leh, Sittwe lawng chawlhna - Kolkata lawng chawlhna (km. 539)-te a ni.

KMMTTP kaltlang hian Lawngtlai (Mizoram) - Kolkata chu km. 882.21 a ni dawn a, tuna Mizoram - Kolkata inkar kawngpui hman mek km. 1,764 aiin km. 881.79-in a tawi zawk dawn a ni.

He project-a Mizoram chhung chin Lawngtlai - Zorinpui inkara kawngpui sial hna chu kum 2011 khan thawh ṭan a ni a; a tirah cheng vbc. 579.65 ruahman ni mah se, ennawn a nih hnuah vbc. 1,028.15 ruahman a ni. Mizoram chhunga km. 87.51-a thui kawngpui siam turah km. 84.19 zawh a ni tawh a, hmun pariatah lei dawh mek a ni.

PWD chhût dan chuan, KMMTTP-a Mizoram chhunga hna thawh tur zinga 96.21% zawh a ni tawh a, hna thawhna atan sum hmuh tur zinga 95.68% an hmuh tawh. Chutih laiin, zangnadawmna chungchangah court-a thubuai kal mek a awm bawk.
Governor nena inkawmnaah hian PWD secretary JC Ramthanga, engineer-in-chief Henry Lalmuankima leh chief engineer (Highways) Lalruatkima leh, LRS secretary R Zarzosanga te an tel a ni.