Photographic Salon neih mek a ni

Mizoram School of Photography leh Photography Club of Mizoram chuan nimin khan Photographic Salon vawi lina an buatsaih ṭan a, Mizoram Youth Commission chairman Dr Vanlalṭanpuia, MLA-in a hawng.

Dr Vanlalṭanpuia chuan, thiamna hmanga inelnaah Mizo ṭhalaite an la hniam a, ṭan lâk thar a ngai tih sawiin, "Eizawnna tlak skill development kan neih ngei ngei a ngai a, kan thiam thil neih sate kan tihpun a, kan inzir belh zel a ngai," a ti a; tuina neih loh chuan nun a hlim theih loh avangin tuina ngeia eizawn theih tum turin ṭhalaite a chah.

MYC Chairman chuan, MYC-in ṭhalaite tan theihtawp a chhuah tih sawiin, "Ṭhalaite thiam thil hrang hrang hi MYC chuan a ngai pawimawh vek a, chung zingah chuan photography pawh a tel. Photography hi tun aia eizawnna tlak a nih theih nan a ṭul angin kan thawkho ang," a ti.

Hawnna inkhawm kaihruaitu Malsawm-tluanga, MSP leh PCOM dintu leh director chuan, Mizoram School of Photography chu kum 2017 a din a nih thu leh mi 180 chuangin thlalak an zir chhuah tawh thu a sawi a; zir chhuakte zingah sorkara lut leh mahnia eizawnna nei, India ram leh ram pawn thlenga eizawn nana hmang an awm tawh thu a sawi bawk.

Photography Salon-ah hian mi 37-te thlalak 119 pho chhuah a ni a, November 27, 2021 thleng neih a ni ang.