Lengpui Airport chei hna thawktu Kamlova Chhangte inti Mizoah pawm lo Kamlova ST nihna hi paih ni rawh se - MSU

Mizo Students’ Union (MSU) Gen. Hqrs chuan Kamlova Chhangte s/o Thangchhuana Chhangte, Ṭhuampui, Aizawl schedule tribe certificate titawp (cancel) tura ngenna nimin khan Aizawl DC hnenah an thehlut.

Kamlova Chhangte hi Lengpui Airport chei ṭhat hna thawh meka contractor niin KR Consruction neitu a ni.

MSU chuan, Kamlova Chhangte s/o Thangchhuana Chhangte, Ṭhuampui chu Mizo Customary Law (Mizoram Gazette Extra Ordinary No.XXXIV) tarlan angin Mizo hnamah an pawm thei lo tih an tarlang a, "MSU chuan kan hnam a him zel theih nan scheduled tribe certificate nei thei tura hriatpuina pe theite chu tun hnuah chuan fimkhur taka kalpui turin kan ngen a ni," an ti.

Kamlova Chhangte hi Mizo a ni loa sawi a ni a; MSU tarlan danin, June 27, 2018 khan Aizawl DC-a Judicial Branch chuan scheduled tribe certificate (Regd. no. CCC15030036113 of 27th June 2018) a pe a ni.

Document-a a lan danin, Kamlova Chhangte hi Lengpui Airport chei ṭhat hna thawh mekah contractor pahnih zinga pakhat zawk, KR Construction neitu a ni.

NESIDS funding hnuaiah airport chei hna hrang hrang - Construction of Elevated Road, Construction of Departure Ramp (2 nos), Extention of Baggage Make-up Area, SITC of MRV/VRF Centralised Air Conditioners, Internal Electrification of Terminal Building, Underground Cable (XLPE/PVC) for First Floor Conveyer Belt siam hnate a thawk a, a hna atana sum ruahman chu Rs. 19,59,00,000 a ni.

Hetih lai hian, Kamlova Chhangte hi Mizo ni loin, a hming tak chu Kamrul a ni a, ST certificate-a a pa anga tarlan Tlangchhuana Chhangte chu Kamlova Chhangte (Kamrul-a) nupui ú a nia thu dawn a ni.

Tun hnai khan Mizoram BJP ṭhalai pawhin thuchhuah siamin, Lengpui Airport chei mekah contractor atan Kamrul Uddin hmanruaa an hman duh vangin Kamlova Chhangte tihin tribal certificate an siamsak tiin, “Hnam phatsanna ang hialah kan ngai,” an ti.