MLA hlui C Ramhluna vuiliam a ni

MLA hlui C Ramhluna (74) w/o Lalrinawmi, Bawngkawn chu No­vember 22, Thawhlehni zan dar 8:45 khan a thi a, nimin khan BCM City Church, Bawngkawn Kohhran hall-a thlah a nih hnuah chhun dar 12 khan BCM City Church biak-inah vui a ni.

October 20, 1947-a Chawnhù, Lawngtlai district-a piang C Ram­hluna hi thiamna lamah M.Sc. (Forestry) a ni a, Mizoram University aṭangin kum 2002-ah LL.B a zo bawk. Kum 1971 aṭangin Meghalaya State Forest Service a zawm a, kum 1975 khan Indian Forest Service (IFS/IFoS)-ah a tling leh a, Mizo zinga direct-a IFoS-a tling hmasa ber a ni.

IFoS anga a service chhungin Mizoram leh Arunachal Pradesh sorkarah a thawk a, kum 2006 khan Mizo­ram Principal Chief Conservator of Forest (PCCF) niin, Mizo zinga PCCF hmasa ber a ni. October 2008-ah PCCF aṭangin voluntary pension-in a chhuak.

Kum 2008 tàwp lama Assembly inthlanpuiah MNF ticket-in Lawngtlai West bialah MLA atan thlan tlin a ni a, term khat chhung MLA a ni. Kum 2019 aṭang khan Mizoram sorkarah Commerce & Industry Development Board-ah vice chairman a ni a, he mawhphurhna hi a thih thlengin a chelh.

C Ramhluna hi Shillong-a a awm laiin mipa zaipawl 'A hma­ngaihna faktute' tihah a tir aṭangin a tel a; kohhranah rawngbawlna hrang hrang chelh tawhin, October 1994 khan BCM Central Church-ah kohhran upa atan nemngheh a ni.

C Ramhluna hi zun­thlum leh thisen sang nei a ni a, kumin August thla aṭangin damdawi-inah leh in lamahte enkawl a ni ṭhin a; October 28, 2021 khan Ebenezer Hospital-ah dah luh leh a ni a, November 22, Thawhṭanni zan dar 8:45 khan a thi ta a ni.