KHAWTHLIR

RTPCR result enna zmcvrdl.com
Zoram Medical College (ZMC) chuan RTPCR test result enna website zmcvrdl.com an siam thar. Website-ah hian ENT OPD-a sample lakte result bakah, páwn lam aṭanga RTPCR hmanga endik tur swab sample lakte result en theih a ni a, SRF ID chhut luha download tur a ni.

MRB branch thar
South Vanlaiphai khuaa Mizoram Rural Bank branch thar chu nimin khan MRB chairman Vadde Jayachandra-a'n a hawng a, MRB branch 94-na a ni. MRB hi September 27, 1983-ah Regional Rural Bank Act, 1976 hmanga din a ni a, tunah hian Mizoramah branch 94 neiin, RD block zawng zawngah branch an nei vek tawh a ni.

Meizial man
Assam Rifles leh Champhaia Customs department mite chuan November 22, Thawhṭanni khan Champhai Chhungte huam chhungah ram dang meizial (foreign cigarette) bawmpui pali leh a neitua puh an man. Meizial hi Rs 5,20,000 man a ni.

Online art workshop
Information and Public Relations director Lallianpuii chuan nimin khan a pisaah IPR department leh Mizoram Art Development Society buatsaih Online Art Workshop a hawng. Workshop-ah hian artist 74 an tel dawn a, November 26, Zirtawpni thleng neih tur a ni.

Sialhau tlawh
Tuikum bialtu MLA Lalrinawma chuan nimin khan a bial chhung Sialhau khua a tlawh a, Covid-19 léng chungchangah village task force hruaitute a kâwm. Lalrinawma hian Sialhau Handloom Centre sak mek leh Covid-19 veite enkawlna CCCC-te tan bungrua leh MLA fund aṭangin Rs 70,000 a pe.

Pipe phúm dawn
SIPMIU chuan vawiin aṭanga December 9, 2021 thleng zing dar 9 aṭanga zan dar 8 inkarah Lower Chanmari - Bazar Bus Stand kawngpuiah pipe phûm hna an thawk dawn a, hei vang hian kawngpui hi a chanve khâr a ni dawn. Hnathawh tibuai theia kawngpui sira lirthei leh bungrua dah phal a ni lo.