NABARD suma sikul chei ṭhatnaah thil dik lo a awm ngei - MZP President

MZP hruaitute chuan nimin khan an pisaah thuthar thehdarhtute an kâwm a, an hmachhawp leh hmalak tum dante sawiin, "NABARD sum cheng nuai 3,500 hmanga sikul chei ṭhatah thil dik lo leh felhlel a awm ngei a ni," an ti.

MZP president Lal­nun­mawia Pautu chuan, NABARD sum hmanga sikul chei ṭhat hna thawh chu uluk taka an zir chian mek thu sawiin, "Kan hriat tawh chinah pawh thil dik tâwk lo leh felhlel a awm ngei tih benga kan hriat bakah mitin kan hmu a ni," a ti a; sikul chei ṭhatte chu a hmun ngeiah tlawhin an endik vek dawn tih a sawi.

MZP President sawi danin, November 22, 2021-a MZP Executive Committee ṭhukhawm chuan NABARD sum hmanga sikul building ṭhahnem tak sak ṭhatah thil dik lo leh fel tâwk lo a awma an hriat avangin a chhui chiang tur committee an din a; MZP headquarters, sub-headquarters leh branch-te chu an huam chhunga hnathawhte endik a, chawlhkar khat chhungin MZP Gen.Hqrs-ah report thehlut hman turin an ti a ni.

Sikul chei ṭhatna sum chu rulh leh ngai a nih thu sawiin Lalnunmawia Pautu chuan, "Tuna a lan danah chuan zirlaite hmangin sum an siam a ni ringawt. GST, etc. paih hnuah pawh estimate nena àwm ang lo lutuka sikul chei ṭhatte a awm. Ṭhenkhat erawh chu ṭha taka sakte pawh a awm ve tho," a ti.

School Education Director-in hnaa sum awm zat aṭanga civil work-ah GST 12%, labour cess 1%, contingency 2.5% leh electrification atan 7.5%, a vaiin 23% a awm thu thuchhuah siama a tarlan chungchangah Lalnunmawia chuan, "Kan bulah 25% a ti a, a thuchhuahah 23% a ti leh a ni," a ti a; estimate pawh NABARD document leh School Education department document kawlah inmil lo a awm thu a sawi.

MZP President chuan, zirlai pawl an nih angin zirlaite an dah pawimawh ber tih sawiin, "Chumi dawtah chuan ram leh hnam kan ngai pawimawh ang," a ti.

MZP hruaitute chuan, kumin December thla tìrah Boropansury tlawh an tum thu sawiin, "Zofate Chawlhbûk kan sak ram chinah ram rawn hung an awm tih report kan dawng a, chu'ngte enfiah pah chuan Chakma tlawmngai pawl hrang hrang hruaitute kan kâwm ang," an ti a; Chakma NGO-te chu foreigner rawn lut tur dan kawngah leh hnawhchhuah kawngah thawhpuia sàwm an tum thu an sawi.

Scholarship chung­changah MZP hruaitute chuan, Chief Minister an sawipui hnuah pek chhuah a nih thu sawiin, "Keini chuan sum release ngawt hi ngaihṭhatna chi-ah kan ngai lo. Zirlaite account-a a luh hma chu lawmawm kan ti lo a, November 24, 2021 thleng kan nghak ang a, zirlaite account-a a luh loh chuan CM Bangla bulah lungawi lohna kan lantir ang," an ti.