Sum leh pai enkawlah MNF sorkar a hlawhchham: Congress

Mizoram Pradesh Congress Committee (MPCC) chuan, MNF hruai Mizoram sorkar chu sorkar sum leh pai enkawlnaah chiang taka hlawhchhamah an puh.

MPCC chuan, Mizoram sorkarin a hun taka sorkar hnathawkte hlawh pek theih loh vang leh dearness allowance (DA) chungchanga an chanvo pek theih loh avangin Federation of Mizoram Government Emloyees & Workers (FMGEW) an au chhuah a ngai ta hial tih an sawi a, "Congress party chuan pawi kan ti tak zet. Sorkar hnathawkte hian an hlawh leh an chanvo dangte hi dan ang takin a hun takah an dawng ngei tur a ni," an ti.

Congress sorkar laiin Mizoram sorkar sum dinhmun nasa takin siamṭhat a ni a, harsatna tênau awm ve mah se, sorkar hnathawk nghette'n hlawh lâk chungchangah harsatna an nei ngai lo nia sawiin MPCC chuan, "GP Fund, medical reimbursement leh pension pawisa thlengin sorkar hnathawkten harsatna an tâwk ngai lo," an ti a; Mizoram sorkar sum leh pai dinhmun nasa takin an siamṭha a, ngêlnghet taka an kalsan thu an tarlang.

Congress party chuan, December 2018-a MNF sorkar a pian aṭangin Mizoram sorkarin sum leh páiah harsatna naménlo a tâwk nghal tih sawiin, "Sorkar hnathawkte'n harsatna chi hrang hrang an tâwk leh ta. Heng zawng zawngah hian MNF sorkarin Covid-19 mawhpuh vek tum mah se, sum leh pai enkawlna kawnga MNF sorkar a hlawhchham chian em vang a ni zawk," an ti.

MPCC chuan, MNF sorkarin Covid-19 vanga sum leh pai tlahniam anga an sawi laiin, CM laina hnaite tana cheng vaibelchhe tam tak sênga airport chei ṭhat hnaah buaina a awm lo a, mau chìnna turah sum leh pai harsatna a awm loh thu te, an duhsak zawngte hnenah PAHOSS ṭanpuina tam tak an pek thu te, an duhsak zawngte hnena contract an pek reng thute an tarlang bawk.