Mizoram aia hripui vei hmuh belh tamna state pali a awm

November 22, Thawh­ṭanni khan Mizoramah Covid-19 vei mi 423 hmuh belh a ni a, India ramah Mizoram aia hmuh belh tamna state pali a awm. Nimin khan hripui vei dam tawh mi 465 chhuahtir an ni a, Covid-19 vangin mi pahnih an thi.

Covid-19 vei Thawh­ṭannia hmuh chhuahte chu ZMC laboratory-a hmuh 37, TrueNAT hmanga hmuh 63, RAT hmanga hmuh 317 leh Fluorescent Immunoassay (FIA) hmanga hmuh paruk an ni a; mipa 172 leh hmeichhia 251 an ni.

IDSP record angin, Mizoramah Covid-19 vei 1,32,320 hmuh chhuah a ni tawh a, mipa 64,025 leh hmeichhia 68,295 an ni a, mipa aiin hmeichhia 4,270-in an tam zawk. Nimin tlai dar 5 thleng khan mi 1,27,591 (96.43%) chhuahtir an ni tawh a, mi 482 (0.36%) thi tawhin, enkawl mek mi 4,247 (3.21%) an awm.

Nov. 22, Thawhṭannia Covid-19 vei hmuh thar mi 423 zingah symptom nei mi 276 an awm a, mi 147-in symptom an nei lo.

Thawhṭannia India rama Covid-19 vei hmuh tharah Mizoram aia hmuh chhuah tamna state pali a awm a; chu'ngte chu Kerala (mi 3,698), Tamil Nadu (750), Maharashtra (656) leh West Bengal (615)-te a ni.

November 22-a swab sample endik aṭanga hripui vei hmuh zat (positivity rate) 10% chung lam district panga a awm a, a sanna ber Serchhip district-ah 25.58% a tling. Positivity rate 10% chung lam district dangte chu - Mamit 16.03%, Hnahthial 15.73%, Champhai 12.22% leh Lunglei 11.37%-te a ni.

Tun November thla chhungin Mizoramah Covid-19 vei mi 10,796 hmuh chhuah a ni tawh a, chawhrualin ni tin mi mi 490.73 hmuh chhuah an awm ang a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 22, 2021 thlenga swab sample endik tawh 14,04,419 aṭanga RT-PCR hmanga endik zat percentage chu 22.91 a ni a, RAT hmanga endik zat chu 71.18% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,32,320 chu mi 1,000 zelah hripui vei mi 120 an awm ang a ni a; mi 1,00,000 zela Covid-19 vangin mi 43 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 465 chhuahtir an ni a; Aizawl district-ah mi 327, Champhai district-ah 61, Kolasib district-ah 30, Lunglei district-ah 18, Lawngtlai district-ah 15 leh Mamit district-ah mi 14 an chhuak a ni.