Covid-19 vangin mi 482 thi tawh

Nimin khan tlai dar 5 thlengin Covid-19 vangin Mizoramah mi pahnih an thi a, Thawhṭanni zan khan mi pakhat a thi bawk. Nimin tlai dar 5 thleng khan Mizoramah Covid-19 vangin mi 482 an thi tawh a, November thla bikah mi 50 an thi tawh.

November 22, Thawhṭanni zan dar 6:47 khan Rohmingthangi (54), Sangau, Lawngtlai district chu Covid-19 vangin State Referral Hospital-ah a thi a; Covid-19 vei a ni tih November 3, 2021 khan hmuh chhuah niin, SRH-ah enkawl nghal a ni a, natna dang nei tel a ni tih sorkar thuchhuakin a tarlang.

Nimin zing dar 1:20 khan H Lalrinawmi (89), Mission Veng chu hripui vangin SRH-ah a thi a, natna dang nei tel a ni. Covid-19 positive a ni tih October 30, 2021 khan hmuh chhuah a ni a, November 5 aṭangin SRH-ah enkawl a ni. Kaphnuna (88), Hnahthial Electric Veng pawh nimin chhun 12:50 khan hripi vangin Hnahthial CCC-ah a thi; Covid-19 vei a ni tih nimin khan finfiah a ni a, CCC-a dah luh a nih hnuah a thi a ni.