Aizawlah ex-gratia dilna 229 lut tawh

Aizawl district-ah nimin zing dar 7 thleng khan Covid-19 vangin mi 333 an thi tawh a, chu'ng zinga mi 229 chhungte chuan Aizawl District Disaster Management Authority/ Aizawl DC-ah Covid-19 vanga thite ràlna (ex-gratia) dilna an thehlut tawh.

Aizawl DC pisa aṭanga Vanglaini thu dawn danin, nimin thleng khan Aizawl district-a Covid-19 vanga thite ràlna pe tura dilna 229 an dawng tawh a, "Vawiin hian dilna 205-ah pawisa thun turin account an neihna bank-ah pawisa kan pe chhuak a, mi dang 24 chu pek theih turin kan la buaipui mek," an ti.

Ràlna hi State Disaster Relief Fund (SDRF) aṭanga sum hmuh hmanga pek tur a ni a, mi pakhatah Rs. 50,000 pek tur niin, mi 205-te hnena pek tur chu Rs 1,02,50,000 a ni.