MNF-in C Ramhluna sûnna thu an chhuah

MNF party chuan thuchhuah siamin, MNF MLA hlui leh Commerce & Industry Development Board vice chairman ni lai C Ramhluna, IFoS (Rtd.) natna hrang hrang vanga November 22, Thawhṭanni zana a thi chu an ui thu leh an sùn thu an tarlang.

MNF chuan, MNF adviser ni mek C Ramhluna chu Mizo pa tak, nèlawm leh thawhpui nuam tak a ni tih sawiin, "Zo fate zinga central service inziak tling theite zinga mi chhuanawm a ni. Kum 2008 khan MNF ticket-in Lawngtlai West bial aṭanga thlan tlin a ni a, legislator kalphung hria leh Assembly House-a chêt vel thiam tak a ni. Min kalsan ta mai hi kan uiin lei danah chuan a hun lo kan ti tak zet. A nupui fanau, tu leh fate zawng zawng Pathianin thlamuanna awmpui zel turin kan duhsak a ni," an ti.