Vairengte-Sairang kawng zauh turah Zangnadawmna zat tur tihfel a la ni lo ; Phase li turah phase hnih pawm a ni tawh

Ministry of Road Transport & Highways (MoRTH) hnuaia national highway enkawltu NHIDCL-in NH-06 leh NH-306 (Vairengte leh Sairang inkar) kawngpui an zauh turah zangnadawmna dawng turte'n an dawn tur zat tihfel a la ni lo. Kawng zauh hna hi hlâwm (phase) lia thawh tura ṭhen a ni a, hlâwm pahnih chu MoRTH-in a pawm tawh.

Vanglaini thu dawn danin, NH-06 leh NH-306 zauh tur hian Aizawl thleng a huam dawn a, Vairengte leh Mualkhang inkar bik chu phase paliah ṭhen a ni. Phase pahnih pawm a ni tawh a, phase pahnih dang pawh MoRTH-in an zir chiang mek. Mualkhang leh Aizawl inkar bik chu phase hnihah ṭhen a ni a, kawng zauhna tur (alignment) a tìra ruahman chu thlak tum a nih avangin ram lâk tur tihfel a la ni lo.

Vairengte leh Sairang inkar bikah chuan kawng zauhnaa ram lâk turah zangnadawmna dawng turte competent authority for land acquisition (CALA) atana ruat Kolasib Additional DC chuan a thehlut tawh. Zangnadawmna dawng turte'n an dawn tur zat tihfel a la ni lo a, tihfel a nih hnuah MoRTH pawmpui tura thawn a ni ang.

Vanglaini palaiin CALA a biak pawh hnuhnun ber ṭum chuan zangnadawmna an la tihfel hnai loh thu a sawi a, "NHIDCL pawhin project hi an la final tak tak lo a, preliminary survey an buaipui mek. Zangnadawmna chungchangah preliminary survey kan zo vek tawh," a ti a; Vairengte lamah ram leh thlai hlut záwng chhût mek a nih thu a sawi.

Tarlan tawh angin Mizoram sorkar chuan The Mizoram (Land Revenue) Act, 2013 amend angin valid pass nei lote pawh pass siam sak tumin hma a la a ni. Valid pass nei lote chuan zangnadawmna-ah ram hlutna an la ve thei lo.

Hemi chungchangah hian Revenue Minister chuan, "Sor­karin remchangah hmangin, kawng siamna tura ram tihchhiat tur neitute kutbénga an awm duh loh avangin an thlahtute aṭanga eizawnna atana an hman tawh leh hman mek hian hlutna nei se tiin dan hnuaiah kawng kan zawnpui a ni," a ti a, mipui hmakhaw ngaia hmalakna niin a sawi.

NHIDCL aṭanga thu dawn danin, MoRTH-in a pawm tawh phase pahnih thawk tur zawnna atan tender chhuah a ni tawh a, zangnadawmna tihfel a nih hunah a rang lama thawh tum a ni. Vairengte leh Sairang inkar kawng zauh hna chu thawh ṭan a nih aṭanga kum hnih chhunga thawh zawh hman tura ruahman a ni.

NHIDCL-in an chhut dan chuan, kawng zauh hna zawh a nih hunah chuan kawng zauh a nih mai bakah, tuna kawng awm mek aiin a tâwi zawk dawn a, chuvang chuan Aizawl leh Silchar inkar chu darkar thum chhung vela thlen theih beisei a ni.

Aizawl by-pass road siam tum chungchang zawhna chhangin NHIDCL chuan, "Consul­tant lamin survey report an thehlut tawh a, MoRTH pawmpuina nghah mek a ni. Anni lamin an pawm hunah a ṭul angin hmalak a ni ang," an ti.