Tax devolution hnuaiah Mizoram tan cheng vbc. 475.42 pek chhuah a ni

Ministry of Finance chuan tun hnai khan chhiah tling khawm state-te hnena an sem ṭhin, tax devolution aṭangin state leh union territory 28-te tan cheng vbc. 95,082 a pe chhuak a, Mizoramin a chan zat chu cheng vbc. 475.42 a ni. Sorkar laipui hian tax devolution hi ṭum hniha a pek chhuah tur ṭum khatah a pe chhuak.

Vanglaini palai zawhna chhangin Finance commissioner Valalchhuanga chuan, sorkar laipuiin sum a pek chhuah chu a lawmawm viau rualin, state-te'n an dawn tura ruahman sa aṭang thoa pek a nih thu a sawi a, "Union Finance Minister-in Chief Minister-te a kawm ṭumin, Covid-19 avanga sum hmuh loh a tam avanga an harsat thu an sawi hlawm a, chumi bawhzuina atan chuan an rawn release a nih hmel," a ti.

Finance Commissioner chuan, tun ṭuma sum pek chhuah chu nakina sum pek chhuah leh dawnah siam rem a nih dawn tho thu sawiin, "A hranpa liau liaua inpek a awm lo. Mahse, a hlâwma an release avang hian eng emaw chen chu min phuhru theiin a rinawm," a ti a; Covid-19 avanga sorkar laipui aṭanga sum hmuh loh a tam avangin state hrang hrangte sum dinhmun a harsat thu a sawi.

Tun ṭuma sum pek chhuah chu centrally sponsored scheme (CSS) atan an dah pawimawh dawn tih sawiin Vanlalchhuanga chuan, "Thil dang atan pawh hman tho tur a nih rualin, CSS-ah priority pek kan tum. CSS kalpui mek, state-in a tum tur pek loh avanga tàwp mai theite a awm. Mimal harsatna pawh kan hrethiam tho a, a theih angin kan pe tho ang. CSS-ah chauh pawh mamawh a phuhru zo dawn lo," a ti.

Finance Commissioner chuan central hnenah Mizoramin pawisa a dawn kim lohte pe tura an ngen ve reng thu sawiin, "Kan ngen reng chungin min pek an tum chuang lo," a ti a, Covid-19 vanga chhiah tlingkhawm a tlem avangin central tan pawh a buaithlak ve tur thu a sawi.