Champhai záwl leilet atana hmang lote Ram tihtawpsak turin CM an ngen Revenue dept.-in leilet an teh ṭha mek

Champhai NGO Coordination Committee leh Champhai Nature Conservancy-te chuan, Champhai leilet záwla ram nei, leilet - wet rice cultivation (WRC) atana hmang lote chu an pass tihtawpsak (cancel) vek turin Chief Minister hnenah ngenna (memorandum) an thehlut.

Champhai zawl hi tunlai hian Land Revenue & Settlement (LRS) department-in an teh ṭha mek a; ram teh zawh lamah phai zawl huam chhunga in leh kudam sakte ṭhiah chungchangah sorkarin hmalak a tum nia thu dawn a ni.

Champhai NGO Coordination Committee leh Champhai Nature Conservancy-te chuan, Chief Minister chu Champhai leilet záwl tihchereua awm mek humhalh a nih theih nan hma la turin an ngen a; The Mizoram Land Revenue Act 2013-in a sawi angin, leilet záwl WRC atana hmang lote chu an ram pass tihtawpsak turin an ngen a ni.

Champhai záwl chu Mizoram tana buh leh bâl thar chhuahna hmun pawimawh, 'Rice Bowl of Mizoram' ti hiala hriat a nih avangin Champhai town area-ah pawh rîn luh a nih loh thu leh WRC area reserved a nih thu an tarlang a; sorkar duh dan ang ngeia WRC atan hman a nih zel theih nan hma an lak thu an tarlang.

Pawl pahnihte tarlan danin, tun hnai kum 2/3 kal ta aṭangin leilet phai kawngpui kamah in leh lo din a ni a, buh hmunte chu chhilh boin, kudam lian tak tak sak a nih avangin kum danga an la tawn ngai loh, tui kawngboin buh leh bâl tam tak a tichhia a, sangha dil tam tak a chhiat phah a ni. Champhai záwla in leh kudam avangin lirthei tam tak a ding a, chu'ng lirthei enkawltute chuan zun leh êk an thlahdah avangin Tuipui lui a bawlhhlawh phah a, mipui hriselnain a tuar thei dawnah an ngai a ni.

Champhai Nature Conservancy leh NGO Coordination Committee chuan, tun hnaiah LRS department-in Champhai záwl ram an teh mekah kawngpui kama in leh kudamte chu kal kânin, WRC area tibawrhbangtute ṭan chhan tur remchang siamsak tumna ni àwm taka hmalakna a awm nia an hriat thu an tarlang bawk.

Páwl pahnihte hian Chief Minister-a lehkha an thehluh chu Agriculture Minister, LRS Minister, Champhai khawpui bialtu MLA pahnihte leh Champhai DC hnenah a copy an pe tel a ni.

Champhai DC Maria CT Zuali chuan Vanglaini palai zawhna chhangin, Champhai záwl chu tunlai hian LRS department-in an teh ṭha mek tih a sawi a, "Zotlang lam hi an teh zo tawh niin kan hria a, Zote lam leh Tlangsam lamah an la teh zo lo niin kan hria," a ti.

Leilet záwl huam chhunga in leh kudam sakte ṭhiat tura thupek lo chhuah tawh chung-changah Champhai Bawrhsap chuan, "Revenue department lamin ram an teh zawh lamah in leh kudam sakte ṭhiah chungchang hi chu kan bawhzui leh ang," a ti.

Champhai DC chuan, in leh kudam ṭhiah duh lotu, leilet záwla ram nei intél khawm zingah ram nei zawng zawng an tel loh thu a sawi bawk.