Permit pek chhuah leh tum duh loin Two wheeler taxi-te'n flag dum zár dawn

Aizawl Two Wheeler Taxi Association (ATTA) chuan thuchhuah siamin, Transport department-in two wheeler taxi permit pek chhuah leh a tum chu an duh lo tih an tarlang a; an duh lohna lantir nan vawiin hian an taxi-ah puan dum an zár dawn tih an puang.

ATTA chuan, Congress sorkar laiin two wheeler taxi 496 a awm thu tarlangin, "Tun ministry hian kum thum chhung hian two wheeler taxi permit 1,889 a pe tawh a,tunah hian taxi la siam loh permit nei si eng emaw zat a awm mek bawk. Hetiang a nih laia permit pek chhuah leh an la tum zel hi kan duh lo hle a ni," an ti.

ATTA hruaitute leh páwl member zingah two wheeler taxi kum hnih/thum khalh tawh chunga permit nei lo, nupui fanau châwm nan tak taka hmang an awm nual tih tarlangin ATTA chuan, "Sorkara hmelhriat nei ṭha leh party mi leh sa eizawn nana hmang chuang si lo, hralh leh an tam hle," an ti a; induhsakna atana two wheeler taxi permit hman an duh loh thu an tarlang.

AMC-in stand an pekah two wheeler taxi 127 chiah an din theih thu tarlangin ATTA chuan, "Tun ministry-in permit 1,889 a pe chungin AMC hian stand pakhat mah min la pek belh lo. Kan lungawi lohna lantir nan November 25, Ningani aṭangin kan taxi-ah puan dum zárin lungawilohna lantir ni se kan ti a ni," an ti.