Congress leh MNF an inpuh tawn mek - Lalduhoma

ZPM leader Lal­duh­oma chuan, Sakawr­hmuituai tlanga skywalk project leh Durtlang-Chaltlang ropeway pâmṭùl chhanah Congress leh MNF party-te an inpuh tawn mek tih sawiin, zahthlak a tih thu leh Kristian zia lo hlea a hriat thu a sawi.

Nimina Saipum community hall-ah ZPM block thar, Serlui East Block hawnna leh mi thar lawm luhna inkhawmah thu sawiin Lalduhoma chuan, "Tun hnaiah Sakawrhmuituai tlang skywalk project leh Durtlang-Chaltlang ropeway hna pàmṭùl chhanah Congress leh MNF an inpuh tawn mek a, mipuiin thu dik an hriat an hlau hle niin a lang. Hetiang thil a awm leh ṭhin hi a pawiin a zahthlak a, a Kristian zia lo hle a ni," a ti.

ZPM Leader chuan, Pathian leh mipui zarah ZPM an sorkar hunah chuan thil dik lo leh chumi avanga inpuhna ang chu a thlen an phal dawn lo tih sawiin, a thleng palh a nih pawhin a chhan zawng chhuakin, hrem ngaite hrem turin hma an la nghal zel dawn tih a sawi.

Lalduhoma chuan, "Mizoram khaw lian leh têa mipui titi ber chu kum 2023-ah chuan ZPM an sorkar tawh dawn tih a ni. Mipuite'n kan lakah beisei sang tak an nei a, chuvang chuan ZPM hian mipui kan tibeidawng thiang lo a, mipui an bei­dawn lohna turin kan sorkar tûk aṭangin ram kaih­hruai dan tur mithiam rualte'n an duang mek a ni. ZPM sorkar hunah kalphung a danglam dawn a, kut hnathawktute leh ṭhalaite'n an thawh leh thiamna phû tâwkin hlawh an hmu tawh dawn a ni," a ti.

ZPM Leader Lalduhoma chuan, Congress party chu party ropui leh ṭha tak, hun rei tak chhung rorél tawh an nih thu sawiin, "Thil ṭha leh chhuanawm tak tak pawh min hnutchhiah. Amaherawhchu, tunah chuan Congress hun hi central-ah leh Mizoramah a her liam mek a, ZPM hun a inher mek. Congress unau te, in finna leh theihna te, remhriatnate kan mamawh a, ZPM-ah in tán kawngka zau takin a inhawng a ni," a ti.

MNF pawh ram leh hnam tana theihtawpa bei an nih thu sawiin, Lalduhoma chuan, "Páwl hi hruaitu a dik loh chuan thil a fel ṭhin lo a, tuna MNF hruaitute hi mipuite'n rin zêl tlâkah an ngai tawh lo," a ti a; MNF unaute chu ZPM-ah ram leh hnam tana ke pên turin a sáwm.

ZPM working president K Sapdanga pawhin thu sawiin, ZPM chu kum 2017-a ding chauh a ni chungin inthlan hrang hrang an hmachhawn tawh thu a sawi a, "Kut ruak maia bul ṭanin, party ro ber kan ni. Hetiang kan ni chunga kan hmasawnna ngaihtuah chuan Pathian malsawm party kan ni tih loh rual a ni lo. Party mawm zawk leh sum leh paia harsa lo zawk an awm laia kan party min rawn bèltu an awm zel hi a lawmawm tak zet a ni," a ti.

K Sapdanga chuan, hnam party nia inchhálte sorkarna hnuaia contract hnaa induhsakna thil avangin hnam tana thil pawi leh hnam pawikhawih a thleng ta tih sawiin, "A pawi tak zet a, Mizote rilru a tiná a, an kaihhruaina hnuaiah hian kan ram leh hnam hi a him lo. Zirlai pawlte hmalakna kan thláwp tlat a ni," a ti a; ZPM sorkarna hnuaiah chuan hnam tana pawi tur a thlen an phal dawn lo tih a sawi.

Mizoramah politics kalphung thar a chhuak tih sawiin Sapdanga chuan, "Mizoram mipui zingah mi chi hnih kan awm ta. A chi khatna chuan ram rorelna ṭha din tur hian thianghlim taka beih an duh a, chung mite chuan ZPM an bèl a, Pathian hriatpui tlâka campaign an duh," a ti.