Covid-19 vei lo tih finfiah
Ni 14 inkhung hran hnua Covid-19 vei hmuh chhuah Zarkawt leh Upper Republic mi pahnih chhungte swab sample endik result a chhuak a, Covid-19 an kai lo.
Veng pahnih local task force hruaitute hnen aṭanga Vanglaini thu dawn danin, Covid-19 an vei lo tih finfiah ni tawh mah se, an inah inkhung hrang rih tura tih an ni a; Covid-19 vei pahnihte erawh chu Zoram Medical College (ZMC)-ah enkawl an ni.
Hetih lai hian, Vairengte aṭanga Aizawl thleng hnam dang pakhat Covid-19 vei phurtu Edenthar Venga Pik-up khalhtu test result chu he thu ziah lai thleng hian hriat a la ni lo a; Edenthar Veng khawtlang hruaitute chuan an vengah curfew an la puang chhunzawm.
Edenthar Veng miin hnam dang a phurh hi June 11 zan khan Covid-19 a vei tih finfiah a ni a, hnam dang phurtu hi an veng mi tih an hriat veleh Edenthar Veng khawtlang chuan June 12 aṭangin an vengah curfew an puang a ni. June 12 vek hian lirthei khalhtu swab sample lak a ni.
Edenthar Veng khawtlang hruaitute chuan Vanglaini palai zawhna chhangin, swab sample test result an hriat hma chuan curfew an puan dawn thu an sawi a, "Result kan la hre thei si lo a, a buaithlak khawp mai. Lirthei khalhtute chhungkua pawh an inah kan la inkhungtir vek rih," an ti.