KHAWTHLIR

MPSC member
Vanlaltlana, MES (Rtd.) chu Mizoram Public Service Commission (MPSC) member atan ruat a ni. MPSC member atana Vanlaltlanaruatna notification chu November 23, 2021 khan tihchhuah a ni a, thla khata a hlawh tur chu Rs. 2,04,000 a ni.

Thisen pe
Pachhunga University College Alumni Association chuan nimin khan Aizawl Civil Hospital tan thisen unit 27 an pe a, petute mipa 24 leh hmeichhia pathum an ni. November 23, Thawhlehni khan Thingsulthliah Branch YMA-in Aizawl Civil Hospital tan thisen unit 54 an pe a, petute mipa 38 leh hmeichhia 16 an ni a; Thingsulthliaha PYD (NEI) member mipa 26 leh hmeichhia pasarihte'n thisen unit 33 an pe bawk.

SVEEP rally
Chief Electoral Officer, Aizawl District Election Officer leh Aizawl Thunder-te chuan nimin khan SVEEP Campaign Bikers Rally an buatsaih a, DEO Dr Lalhriatzuali Ralte, Aizawl bawrhsapin Bawngkawn Brigade Field aṭangin a vailiam.

Kawng laih enfiah
Vanhnuailiana Group YMA hruaitute leh PWD hotute chuan nimin khan PMGSY hnuaia Khuangleng - Buang kawng laih mek chu hun tiam chhunga zawh hman loh hlauhawm khawpa hna a chak loh avangin an enfiah. He kawng laih hi kum 2018-ah ṭan a ni a, km. 9.20-a thui niin, March 2022-a zawh tura tih a ni.

Bungkawn zawk
November 22, Thawhṭanni zana thi MLA hlui C Ramhluna awmna veng, Bawngkawn tia nimin lama tarlan chu Bungkawn tih zawk tur a ni. Tihsual palhah chhiartute hriatthiamna kan dil e.

Kawng siam dawn
SIPMIU chuan November 27-28, 2021 chhungin Chanmari leh Chanmari West inkar kawng siam hna an thawk dawn a, hna thawh chhungin kawngpui khâr a ni ang. Hnathawh tibuai thei tura lirthei leh bungrua kawngpuia dah phal a ni lo.