November thlaah hripui vei Mi 11,196 hmuh a ni tawh

November 23, Thawhlehni khan Mizoramah Covid-19 vei mi 400 hmuh belh a ni a, November thla chhungin mi 11,196 hmuh chhuah a ni tawh. Nimin khan hripui vei dam tawh mi 302 chhuahtir an ni a, Covid-19 vangin mi pahnih an thi.

Covid-19 vei Thawh­lehnia hmuh thar mi 400-te chu mipa 187 leh hmeichhia 213 an ni a; ZMC laboratory-a hmuh chhuah 52, TrueNAT hmanga hmuh 31, RAT hmanga hmuh 309 leh Fluorescent Immunoassay (FIA) hmanga hmuh pariat an ni.

IDSP record angin, Mizoramah Covid-19 vei 1,32,720 hmuh chhuah a ni tawh a, mipa 64,212 leh hmeichhia 68,508 an ni a, mipa aiin hmeichhia 4,296-in an tam zawk. Nimin tlai dar 5 thleng khan mi 1,28,084 (96.51%) chhuahtir an ni tawh a, mi 484 (0.36%) thi tawhin, enkawl mek mi 4,152 (3.13%) an awm.

November 23, Thawhlehnia Covid-19 vei hmuh thar mi 400 zingah symptom nei mi 255 an awm a, mi 145-in symptom an nei lo.

Thawhlehnia swab sample endik aṭanga hripui vei hmuh zat (positivity rate) 10% chung lam district panga a awm a, a sanna ber Lawngtlai district-ah 23.42% a tling. Positivity rate 10% chung lam district dangte chu - Hnahthial 20.24%, Serchhip 16.22%, Champhai 12.95% leh Aizawl 10.75% a ni. Khawzawl district-ah hripui vei hmuh a ni lo.

Tun November thla chhungin Mizoramah Covid-19 vei mi 11,196 hmuh chhuah a ni tawh a, chawhrualin ni tin mi 486.78 hmuh chhuah an awm ang a ni a, a hniam hret hret.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 23, 2021 thlenga swab sample endik tawh 14,08,776 aṭanga RT-PCR hmanga endik zat percentage chu 22.87 a ni a, RAT hmanga endik zat chu 71.22% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,32,720 chu mi 1,000 zelah hripui vei mi 121 an awm ang a ni a; mi 1,00,000 zela Covid-19 vangin mi 44 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 302 chhuahtir an ni a; Aizawl district-ah mi 187, Champhai district-ah 42, Serchhip district-ah 29, Hnahthial district-ah 14, Khawzawl district-ah 10, Mamit district-ah pakua, Kolasib district-ah paruk leh Lawngtlai district-ah mi panga an chhuak a ni.