Governor leh Railways hotute an inkâwm

Governor Hari Babu Kambhampati chuan, nimin khan Raj Bhavan-ah North East Frontier Railway (NEFR) hotute a kâwm a, Bairabi leh Sairang inkara rél kawng km. 51.38-a thui siam mek te, Hortoki, Kawnpui, Mualkhang leh Sairanga rél chawlhhmun siam mekte chak zawka siam dan tur a sawipui.

Hari Babu Kambhampati chuan, Mizoramin project pawimawh KMMTTP leh rél kawng siam hna a neihte chu Mizoram tana hmasawnna thlentu a nih ngei dawn avangin siam zawh thuai a nghakhlel tih a sawi a; rél kawng siamtute chu working season chhunga theihtawp chhuah tura chahin, "Harsatna in neihte sorkar laipui dàwr ngai chi leh state sorkar anga tihfel theih chinah theihtawp ka chhuahpui ang che u," a ti.

NEFR hotute chuan, hna thawh tur lian tham deuh chu 65% an zo tawh tih sawiin, "Project pawimawh tak hi siam zawh thuai a nih theih nan state sorkarin theihtawp min chhuahpui a, khawtual mite pawh hnathawh tibuai zawnga khawsa an awm lo," an ti a, a lawmawm an tih thu an sawi.

Zangnadawmna phûta court-a kal an awm deuh reng avangin harsatna an tawh thu sawiin NEFR hotute chuan, "Ram neitu nihna inhlan chhâwn pawh a la fel hlei thei lo," an ti a; tihfel thuai a nih theih nan leh state sorkarin rél chawlhhmun panna kawng a siam ve tur pawh siam thuai a nih theih nana hma lakpui turin Governor an ngen a ni.

Rêl kawng siam hna hi national project atan kum 2008-09 khan puan a ni a, November 29, 2014 khan prime minister Narendra Modi chuan project bul ṭanna lungphùm a phúm. Mizoram leilungin a zir loh vang te, hna thawh hun chhung a rei loh avang leh harsatna thleng dang avangin project thawh zawh hun tura ruahman tihdanglam a ni zeuh zeuh tawh a, tuna ruahamnnaah chuan March 2024-ah zawh hman beisei a ni.

Inkawmhonaah hian Mizoram sorkara Transport secretary KT Beicho leh consultant Hrangtawna te, NEFR deputy chief engineer Naveen Prakash leh hotu dangte an tel.