Kolasib-ah Covid-19 chungchang sawiho

Kolasib District Task Force on Covid-19 chu an chairman Dr H Lalthlangliana, bawrhsap kaihhruaiin nimin khan an ṭhukhawm a; Task Group on Documentation buatsaih, ‘Documentation on Covid-19 Volume-II’ chu chief medical officer Dr Lalhlimpuia'n a tlangzarh.

Dr H Lalthlangliana chuan, state dang nena ramri thui tak inṭâwm leh mamawh hrang hrang châwk luhna ber district an ni chungin hripui léng do kawnga hma la ṭha pawl an nih thu a sawi a, "Sorkar department hrang hrang, NGO leh Kolasib mipui thawhhona ṭhat vang a ni a, thla hnih chhung chu Covid-19 test neih zat aṭanga chhûtin hripui kai thar pun dan hi 5% aiin a hniam tawh a ni," a ti.

Ṭhutkhawma tarlan danin, Kolasib district-ah hian kumin April aṭanga November 23 thleng khan Covid-19 vei mi 8,153 hmuh chhuah a ni a, September thlaah mi 2,374 hmuh niin, hmuh tam ber thla a ni. Covid-19 vanga thi mi 30 an awm tawh a; Covid-19 vei enkawl CCC-ah 3,523, CCCC-ah 2,547, DCHC-ah 280, SRH-ah 114 leh in lamah mi 2,633 an awm tawh.

Covid-19 vaccine first dose la mi 51,224 leh full dose la mi 36,605 an awm a, Har Ghar Dastak programme kaltlangin first dose 117 leh full dose 50 pek a ni tawh bawk.