MLA-in hna thawh a enfiah

Aizawl North-I bialtu MLA Vanlalhlana chuan nimin khan Bawngkawn Bazar Venga MLA Fund hmanga seal coating leh blacktop hna Rs 4,00,000 hmanga thawh a enfiah a; hna thawh dan chu ṭha a tih thu sawiin, a thawktu (implementing agency) Bawngkawn MUP hnenah lawmthu a sawi.

Vanlalhlana chuan, tunlaiin hmasawnna hnathawh ṭha lo chungchangah political party pahnih inpuhmawhna a nasa hle tih sawiin, "Pakhatin hna thawk si loa contractor hnena pawisa tam tak peah an puh a, pakhatin an bul ṭan tawh chhunzawm duh loah an puh bawk. Hetianga inpuhtawnna ringawtah hian a tàwp leh ang tih a hlauhawm hle a, mipuite'n thu dik hriat kan duh a, kan phû bawk a. Thil dik lo titu hâi lan ngei a nih a, a phu tâwk hremna pek a nih ngei kan beisei," a ti.

Aizawl North-I bialtu MLA chuan, Mizoramah hmasawnna hna thawhna turin kawng hrang hrangin sum tam tham tak tak a lo kal ṭhin tih sawiin, "A nihna anga hman a nih ngai loh avang leh tihchingpen a nih ṭhin avangin kan ram hmasawnna tur kan tichhe zel a, hetiang titute hi hrem loha an chhuah zel bawk si avangin tun dinhmun hi kan thleng ta a ni," a ti a; thil dik lo tih chingte chu mipuiin vote hmanga an hrem ve a hun tawh tih a sawi bawk.