Faina lama hmalakna hawng

Swatch Bharat Mission (Urban) hnuaia fai intihsiakna kal mekah nimin khan Aizawl mayor Lalrinenga Sailo chuan Chanmari West leh Hunthar Vengah faina lama hmalakna tur a hawng.

Lalrinenga Sailo chuan, Aizawl faina, mawina leh thianghlimna turin AMC-in theihtawpin hma a la zel dawn tih sawiin, "Khawpui chhunga ran vulhna rim leh thlite vantlang tana hnawksak awm thei chiah AMC-in hremna a neihte a lekkawh dawn avangin ran vulh danah hma kan sawn a pawimawh," a ti a; Aizawla bawlhhlawh paih rûkna leh hmun ṭawp laite hung vek turin veng 83 zinga veng 40-ah bul an ṭan mek thu a sawi.

Bialtu councillor John Zosangliana Ralte pawhin thu sawiin, a bialte chu Aizawla veng fai ber nih an tum thu a sawi. Councillor hian fainaa hmalakna atan veng pahniha sanitation committee hnenah Rs 10,000 ve ve a hlan a ni.