Health department-in a remtih chuan, Zodintluanga'n Lunglei tan RTPCR lei tum

Thorang bialtu MLA Zodintluanga Ralte, Cong­ress Legislature Party (CLP) leader chuan, Health department-in rem an tih chuan Lunglei Civil Hospital-a dah turin Covid-19 kai leh kai loh endikna kháwl, RTPCR chikim a leisak tur thu, June 13, Inrinni khan a puang.

Zodintluanga Ralte chuan Inrinnia Lunglei DC pisaa Bawrhsap DC, SP, Chief Medical Officer leh sorkar official dangte nen an inkawmnaah RTPCR khawl lei a inhuam thu a sawi a, "Lungleiah hian Covid-19 test-na ṭha RT-PCR hi dah a nih chuan Mizoram chhim lam zawngin an chhawr hle dawn. He hripui hi a reh hun tur hriat a nih loh avangin a endikna khawl hi Lunglei hian a neih ngei a ngai a, tun aṭanga rei vak loah RTPCR hi lei a ni ang," a ti.

Lunglei Civil Hospital-a laboratory chu RTPCR dah­na atan a chei ṭhat sak dawn thu sawiin Zodin­tluanga chuan, "Tun din­hmunah laboratory atan hian level-II pawm a ni tawh a, Lungleiah pawh hian laboratory level-II siam a har lo ang," a ti a; RTPCR dah turin harsatna a awm lo tura a ngaih thu a sawi.

Zodintluanga Ralte hian Lunglei district-a hman atan June 12 khan ambulance a lo pe tawh bawk a ni.

Hetihlai hian Health department chuan nimin khan order tichhuakin Lunglei Civil Hospital-a RTPCR khawl dah theih dan tur enfiah turin Dr H Lalhlenmawia (RIPANS), Prof. John Zothanzama (MZU) leh Dr Vanramliana (PUC) te a ruat a, anni hian vawiinah Lunglei an pan ang.