Lirthei register hun pawtsei Mi 961-in an ziak lut tawh

State Transport Au­thority (STA) chuan July 9, 2019 khan notifi­cation tichhuakin, mihring (passenger) phur chi lirthei neitute chu thla ruk chhungin an lirthei, an hminga awm lote an hminga thlak (transfer of ownership) turin a hriattir. Hming thlak theih hun hi December 2019 khan tàwp tawh mah se, hming thlak lo an la awm nual avangin January 2020 chhung atan pawhsei a ni.

STA notification-a tarlan danin, hun tiam chhunga hming thlak hman lote chu an permit tihtawpsak thlenga hmalak theih a ni a, hun tiam hnu lamah chuan Mizoram Motor Vehicle Rule 1996, Rule 114(1)-in a sawi angin, permit neitu thi a, legal heirship certificate neite chauh hming thlak (transfer of ownership) phal a ni tawh dawn a ni. STA-a mihring phur lirthei, a neitu hminga awm lo, order chhuah hnua an hminga thlak tawh zat chu nimin thleng khan mi 961 an ni.