Kawngpui dan an chhunzawm dawn District 5-ah sorkarin IPC 144 a puang

Mizoram Govt. Lumpsum Grant-in-Aid Higher Secondary School (MIGLAHSSA), School Managing Board leh Joint SU-te'n an thil phut tihhlawhtling tura sorkar karna atana khaw pakuaa kawngpui an dan chu July 28, Inrinni leh nimin khan an titawp lailâwk a, vawiin zing dar 6 aṭangin kawngpui an dan chhunzawm leh dawn.

Hetih lai hian, nimina sorkar thuchhuah chuan, HSS pakuate thil phût hi tihhlawhtlin theih loh a nih thu a puang. HSS pakuate awmna district - Aizawl, Lunglei, Serchhip, Champhai leh Mamit district pumah IPC 144 puan a nih thu leh, duty turin magistrate leh police-te tirh chhuah nghal an nih tur thu a tarlang.

Khaw pakuaah hian lumpsum aided higher secondary school pakuate adhoc grant-in-aid dinhmuna hlankai phût vangin July 26, 2018 zing aṭangin tiam chin awm loin kawngpui dan a ni a, sikul leh sorkar pisa zawng zawng an khâr bawk. Hemi hma hian lumpsum aided higher secondary school pakuate chu June 18, 2018 aṭangin tiam chin awm loin an lo khâr tawh a ni.

Sikul leh sorkar pisa khârna leh kawngpui danna khuate chu - Sakawrdai, Farkawn, Phullen, Thingsulthliah, Zawlnuam, West Phaileng, East Lungdar, NE Khawdungsei leh Zobawk te a ni. Khaw pakuaa Joint Students' Union chuan July 28 khan thuchhuah siamin, kawngpui an dan dawn avangin lirthei hmangin an khua ṭheuhte chu paltlang theih a ni dawn lo tih an tarlang a; an hmalakna chu thlâwp a, zâwm turin an khaw paltlang ṭhinte an ngen.

Joint SU chuan, School Education dapart­ment-in higher secondary school din phalna dan (Rules of 2006) a awm thu an tarlan chungchangah, "Tuna adhoc grant-in-aid-a hlânkai phuta nuar mek HSS pakuate hi he dan hian min huam pha lo a, heng HSS pakuate hi kum 2006 hmaa din vek an ni," an ti.

HSS pakuate leh pisa khâr leh kawngpui dan chungchangah hian Home minister R Lalzirliana hoin nimin khan a inah Finance minister Lalsawta, Education minister H Rohluna leh department hotute an ṭhukhawm. 

Hemi chungchanga sorkar thuchhuah chuan, lumpsum HSS-te adhoc aided-a hlankai chu tunah chuan a theih loh a, lumpsum an nih anga ṭanpuina erawh tihpun tum mek a nih thu a tarlang. Home Minister chuan, "Adhoc grant-in-aid dinhmuna hlankai hi sorkarin tihhlawhtlin duh hle mah se, a theih rih loh a ni," a ti.