Thubuai 1,233 ziak lut tawh

Mizoram Police chuan Mizoram hmun hrang hranga police station-ah kumin January-June chhung khan thubuai 1,233 an ziak lut tawh a, nikum January-June chhunga thubuai ziah luh aiin 39-in a tlem zawk.

Thubuai ziah luh 1,233 zingah hian tualthah thubuai 17 a awm a, nikum kum chanve chhunga thubuai ziah luh aiin pasrihin a tam zawk. Pawngsual thubuai 14 ziah luh niin, nikum nen a inzat. Tualthah tum thubuai panga ziah luh tawh niin, nikuma ziah luh nen a inzat a; thubuai pakhat ziah luh chu mahni intihhlum tum thubuai a ni.

Thubuai ziah luh tam ber chu rûkrûk leh a kaihhnawih thubuai a ni a, kumin chhungin thubuai 672 ziah luh a ni tawh a, nikum aiin thubuai ziah luh 61-in a tlem zawk. Naupang humhimna dan, POCSO Act hnuaiah thubuai 68 ziah luh a ni a, nikuma ziah luh zat 87 aiin 19-in a tlem zawk. Arms Act hnuaiah thubuai pathum ziah luh a ni a, nikum aiin pathumin a tlem zawk a ni.